குரூப் 1 தேர்வு முடிவுகள் வெளியீடு
குரூப் 1 தேர்வு முடிவுகளை, தமிழ்நாடு அரசுப் பணியாளர் தேர்வாணையம் (டி.என்.பி.எஸ்.சி.) வெள்ளிக்கிழமை வெளியிட்டது.
இதுகுறித்து தேர்வாணையம் வெளியிட்ட அறிவிப்பு:
துணை ஆட்சியர், காவல் துறை துணைக் கண்காணிப்பாளர், வணிகவரித்துறை உதவி ஆணையர், ஊரக வளர்ச்சித்துறை உதவி இயக்குநர் ஆகிய 4 பணிகள் குரூப் 1 பிரிவின் கீழ் வருகின்றன.
இந்தப் பணிகளில் 79 காலிப் பணியிடங்கள் இருந்தன. இந்தப் பணியிடங்களை நிரப்புவதற்கான முதன்மை எழுத்துத் தேர்வு 2015ஆம் ஆண்டு ஜூன் 5, 6, 7 ஆகிய தேதிகளில் நடத்தப்பட்டன.
இந்தத் தேர்வில் 3,407 பேர் பங்கேற்றனர். அதில், நேர்காணல் தேர்வுக்கு முந்தைய சான்றிதழ் சரிபார்ப்புக்கு தாற்காலிகமாக 164 பேர் தேர்வு செய்யப்பட்டுள்ளனர். அவர்களது விவரங்கள், பதிவெண்கள் கொண்ட பட்டியல் தேர்வாணைய இணையதளத்தில் (www.tnpsc.gov.in) வெளியிடப்பட்டுள்ளன.
சான்றிதழ் சரிபார்ப்பு ஜூலை 4, 5 ஆகிய தேதிகளில் சென்னையில் உள்ள தேர்வாணைய அலுவலகத்தில் நடைபெறும் என்று அறிவிக்கப்பட்டுள்ளது.
