கோரிக்கை நிறைவேறியது! பி.எட் தேர்வு தேதி மாற்றம்
டெட் எனப்படும் ஆசிரியர் தகுதி தேர்வும், பி.எட் தேர்வும் ஒரே நாளில் நடக்கவிருந்ததால் இரண்டுக்கும் விண்ணப்பித்த விண்ணப்பதாரர்களின் கோரிக்கையை ஏற்று பி.எட். தேர்வு தேதி தற்போது மாற்றப்பட்டுள்ளது. இதன்படி ஜூன் 8ல் நடைபெற இருந்த பி.எட் தேர்வு ஜூன் 13ஆம் தேதிக்கு மாற்றப்பட்டுள்ளதாக உயர்கல்வித்துறை அறிவித்துள்ளது.
டெட் எனப்படும் ஆசிரியர் தகுதி தேர்வின் முதல்தாள் தேர்வு ஜூன் 8ஆம் தேதியன்று நடைபெறவுள்ளது. இதே தேதியில் பி.எட். தேர்வு நடைபெற இருப்பதாக அறிவிக்கப்பட்டிருந்தது. டெட் தேர்வை பி.எட் இரண்டாம் ஆண்டு படிக்கக்கூடிய மாணவர்களும் எழுதுவதற்கு தகுதி உடையவர்கள்.
இந்நிலையில், பி.எட் இரண்டாம் ஆண்டு மாணவர்களின் மொழித்தாள் தேர்வானது, டெட் தேர்வு நடைபெறும் தேதியில் நடைபெற இருந்ததால், பி.எட் தேர்வு எழுதுவதா அல்லது டெட் தேர்வை எழுதுவதா என பி.எட் மாணவர்கள் குழப்பம் அடையும் நிலை ஏற்பட்டது.
எனவே, தேதிகளை மாற்றி அமைக்க வேண்டும் என மாணவர்கள் கோரிக்கை வைத்திருந்தனர். இந்நிலையில், ஜூன் 13ஆம் தேதிக்கு பி.எட் தேர்வை மாற்றி உயர்கல்வித்துறை செயலாளர் மங்கத்ராம் சர்மா உத்தரவிட்டுள்ளார்.
