சிலை முறைகேடு வழக்குள் கைது செய்யப்பட்ட கவிதாவிற்கு ஜாமீன்
சிலை முறைகேடு வழக்கில் கைது செய்யப்பட்ட இந்து சமய அறநிலையத்துறை கூடுதல் ஆணையா் கவிதாவிற்கு சென்னை ஐகோர்ட் ஜாமீன் வழங்கி உத்தரவிடப்பட்டுள்ளது. அவரது உடல்நிலையை கணக்கில் கொண்டே இந்த ஜாமீன் வழங்கப்பட்டுள்ளதாக தெரிவிக்கப்பட்டுள்ளது.
காஞ்சி ஏகாம்பரநாதர் கோவிலில் உள்ள சிலைகளை செய்ததில் முறைகேடு நடைபெற்றதாக வழக்கு பதிவு செய்யப்பட்ட வழக்கில் இந்துசமய அறநிலையத்துறை கூடுதல் ஆணையா் கவிதா கடந்த 31ம் தேதி கைது செய்யப்பட்டார்.
இந்த நிலையில் விசாரணைக்கு அழைக்காமலும், சம்மன் அனுப்பப்படாமலும் கைது செய்ததை கண்டித்து சென்னை உயா்நீதிமன்றத்தில் கவிதா தரப்பில் மனுத்தாக்கல் செய்யப்பட்டது. இது தொடா்பான வழக்கு இன்று விசாரணைக்கு வந்தது. விசாரணையின் போது கவிதா கைது தொடா்பாக பொன்.மாணிக்கவேல் தலைமையிலான குழு தாக்கல் செய்த விளக்கத்தை நீதிபதிகள் ஏற்றனா்.
இதனைத் தொடா்ந்து கவிதா தரப்பில் உடல்நிலையை கருத்தில் கொண்டு ஜாமீன் வழங்க வேண்டும் என்று கோரப்பட்டது. இதற்கு சிலைக்கடத்தல் தடுப்பு குழு எதிர்ப்பு தெரிவித்தது. இருப்பினும் நீரிழிவு நோய், கண் அறுவை சிகிச்சை செய்து கொண்டுள்ள கவிதாவின் உடல்நிலையை கருத்தில் கொண்டு அவருக்கு ஜாமீன் வழங்குவதாக நீதிபதிகள் உத்தரவிட்டனா்.
மேலும் சிலைக்கடத்தல் தடுப்பு பிரிவினா் விசாரணைக்காக கவிதாவை 90 நாள்கள் கும்பகோணத்தில் தங்க உத்தரவிடவேண்டும் என்று கோரப்பட்டது. இதனை ஏற்க மறுத்த நீதிபதிகள் விசாணைக்குழு அழைக்கும் போது கவிதா நேரில் ஆஜராக விளக்கம் அளிக்க வேண்டும். அதுவரை கவிதா திருச்சிலேயே தங்கிக் கொள்ளலாம் என்று நிபந்தனையுடன் ஜாமீன் வழங்கியுள்ளனா்.
