டேராடூன் ராணுவக் கல்லூரியில் 8-ஆம் வகுப்பு சேர விண்ணப்பிக்கலாம்
டேராடூனில் உள்ள தேசிய ராணுவக் கல்லூரியில் 8-ஆம் வகுப்பு சேர விண்ணப்பிக்கலாம் என அறிவிக்கப்பட்டுள்ளது.
இதுகுறித்து நாமக்கல் மாவட்ட ஆட்சியர் மு.ஆசியா மரியம் வெளியிட்ட செய்திக் குறிப்பு:
உத்தரகண்ட் மாநிலம், டேராடூனில் உள்ள தேசிய ராணுவக் கல்லூரிக்கு 2018-ஆம் ஆண்டு ஜூலை மாதத்துக்கு 8-ஆம் வகுப்பு மாணவர் சேர்க்கை நடைபெறுகிறது. தகுதியுள்ள மாணவர்கள் விண்ணப்பங்கள் அனுப்பலாம். இதற்கு 7-ஆம் வகுப்பில் படிக்கும் மாணவர்கள் அல்லது 7ஆம் வகுப்பு படித்து முடித்த மாணவர்களாக இருக்க வேண்டும். 1.1.2018-இல் பதினொன்றரை வயதுக்குக் குறையாமலும், 13 வயதை அடையாமலும் இருக்க வேண்டும்.
அதாவது 2.1.2005-க்கு முன் அல்லது 1.7.2006-க்கு பின்னர் பிறந்திருக்கக் கூடாது. விண்ணப்பப் படிவம் மற்றும் விளக்க கையேட்டை பெற “தி கமாண்டன்ட், ராஷ்ட்ரிய பாரதிய செய்னா கல்லுரி, ராஷ்ட்ரிய இந்தியன் மிலிட்டரி, டேராடூன், உத்தரகண்ட் 248003′ என்ற முகவரிக்கு, பொதுப் பிரிவினர் ரூ. 550-க்கான வரைவோலையை பதிவஞ்சலிலோ அல்லது விரைவு அஞ்சலிலோ அனுப்ப வேண்டும். எஸ்.சி., எஸ்.டி. பிரிவினர் ரூ. 505- க்கான வரைவோலையை பதிவஞ்சலிலோ அல்லது விரைவு அஞ்சலிலோ அனுப்ப வேண்டும்.
தட்டச்சு செய்தோ அல்லது தெளிவான எழுத்து மூலமோ ஆங்கிலத்தில் பெரிய எழுத்தில் அஞ்சல் குறியீட்டு எண் மற்றும் தொடர்பு எண்ணுடன் எழுத வேண்டும். பூர்த்தி செய்த விண்ணப்பத்தைத் தேர்வுக் கட்டுப்பாட்டு அலுவலர், தமிழ்நாடு அரசுப் பணியாளர் தேர்வாணையம், சென்னை 600003 என்ற முகவரிக்கு வரும் 31-ஆம் தேதிக்குள் அனுப்பி வைக்க வேண்டும். இதுகுறித்த விவரங்களை www.rimc.org என்ற இணையதள முகவரியில் அறிந்து கொள்ளலாம்.
