நான் அரசியல்வாதி அல்ல. விஷால் பேட்டி
ஆர்.கே.நகர் இடைத்தேர்தலில் போட்டியிட இன்று வேட்புமனுதாக்கல் செய்யவுள்ள நடிகர் விஷால் இன்று காலை சென்னை அண்ணாநகர் விநாயகர் கோவிலில் வழிபட்ட பின்னர் தனது அரசியல் பயணத்தை தொடங்கினார். பின்னர் ராமாவரம் எம்ஜிஆர் இல்லத்தில் உள்ள அவரது சிலைக்கு மாலை அணிவித்து மரியாதை செலுத்திய விஷால், அதன் பின்னர் தி.நகரில் உள்ள காமராஜர் சிலைக்கு மாலை அணிவித்தார்.
மேலும் அண்ணா, எம்ஜிஆர், ஜெயலலிதா நினைவிடங்களுக்கு சென்று மரியாதை செய்யவுள்ள விஷால் செய்தியாளர்களிடம் கூறியபோது, ‘நான் அரசியல்வாதி அல்ல, மக்கள் பிரதிநிதியாகத்தான் தேர்தலில் போட்டியிடுகிறேன். ஆர்.கே.நகர் மக்களின் தைரியத்தை ஆதரவாக எடுத்துக்கொண்டு தேர்தலில் நிற்கிறேன். இங்கு நான் 100% வெற்றி பெற வாய்ப்பு உள்ளது’ என்று கூறினார்
இன்று மதியம் 12.30 மணிக்கு வேட்புமனு தாக்கல் செய்யும் விஷால் உடனே பிரச்சாரத்தையும் ஆரம்பிப்பார் என்று எதிர்பார்க்கப்படுகிறது. இந்த நிலையில் இயக்குனர் சேரன், ‘விஷால் தனது நடிகர் சங்க, தயாரிப்பாளர் சங்க பதவிகளை ராஜினாமா செய்துவிட்டு பின்னர் தேர்தலில் போட்டியிட வேண்டும்’ என்று கூறினார்.
