டெல்லியில் தனியாக வசித்து வந்த பிரபல நடிகையிடம் கத்தி முனையில் கொள்ளையடித்த 3 பேர் போலீஸாரால் கைது செய்யப்பட்டனர்.
டெல்லியில் உள்ள கிருஷ்ணா நகர் பகுதியில் வசித்து வந்த பிரபல பாலிவுட் நடிகை, வீட்டில் தனியாக இருந்த போது, குடிபோதையில் பயங்கர ஆயுதங்களுடன் நுழைந்த மூன்று பேர் நடிகையை மிரட்டி அவரிடம் இருந்த பணம், ஐபோன் போன்ற விலைமதிப்பு மிகுந்த பொருட்களை திருடினர். அவர்களிடம் இருந்து தப்பிக்க நினைத்த நடிகையை அவர்கள் குடிபோதையில் தாக்கியதால் நடிகைக்கு சிறிய அளவில் காயம் ஏற்பட்டது.
இதுகுறித்து தகவல் அறிந்த டெல்லி போலீஸார் உடனடியாக விசாரணையை தொடங்கியதால் சிலமணி நேரங்களில் மூன்று குற்றவாளிகளையும் டெல்லி விஸ்வாஸ் நகர் அருகே பிடித்தனர். அவர்களிடம் இருந்து திருடப்பட்ட பொருட்களும் கைப்பற்றப்பட்டன.
கைது செய்யப்பட்ட மூன்று திருடர்கள் சதீஷ், ராகேஷ் மற்றும் வீரேந்திரா என்று கூறிய போலீஸார், நடிகையின் வேண்டுகோளுக்கு இணங்கி அவருடைய பெயரை தெரிவிக்க முடியாது என்று கூறினர். அந்த நடிகை பாலிவுட்டின் முன்னணி நடிகை மற்றும் தயாரிப்பாளர் என்று கூறப்படுகிறது.
