பிரபல பாலிவுட் நடிகர் அக்சயகுமார் தனது அடுத்த படமான ‘பிரதர்ஸ்’ என்ற படத்தில் முதல்முதலாக சால்ட் அண்ட் பெப்பர் தோற்றத்தில் நடித்து வருகிறார். சமீபத்தில் இந்த படத்தின் பர்ஸ்ட் லுக் வெளிவந்தபோது அதற்கு ரசிகர்களிடையே பெரும் வரவேற்பு கிடைத்தது.
இதேபோல் பிகே நடிகர் அமீர்கான் தனது அடுத்த படமான ‘டங்கால்’ என்ற படத்தில் குடிகாரராக நடித்து வருகிறார். இந்த படத்தில் அமீர்கானும் சால்ட் அண்ட் பெப்பர் தோற்றத்தில் வருகிறார்.
ஏற்கனவே தமிழில் மங்காத்தா படம் தொடங்கி வீரம், என்னை அறிந்தால் போன்ற படங்களில் அஜீத்தும் சால்ட் அண்ட் பெப்பர் தோற்றத்தில் நடித்துள்ளார் என்பது தெரிந்ததே.
இந்நிலையில் பிரபல பாலிவுட் இணையதளமான பாலிவுட் லைப் என்ற இணையதளம், ‘சால்ட் அண்ட் பெப்பர் லுக்கில் மிகவும் செக்ஸியாக இருக்கும் நடிகர் யார்? என்ற சர்வேயை நடத்தி வருகிறது. சர்வேயில் அக்சயகுமார், அமீர்கான், கிராவிட்டி நடிகர் ஜார்ஜ் குளூனி, அஜீத்குமார் மற்றும் மிலண்ட் சோமன் ஆகியோர் போட்டியிடுகின்றனர்.
தற்போதுள்ள நிலவரப்படி நம்மூர் தல அஜீத்குமாருக்கு இதுவரை 82.99% பேர் வாக்களித்துள்ளனர். அஜீத்துக்கு அடுத்தபடியாக அக்ஷயகுமாருக்கு 11.21%, ஜார்ஜ் குளூனிக்கு 3.26%, அமீர்கானுக்கு 1.79%, மிலண்ட் சோமனுக்கு 0.75% வாக்குகள் கிடைத்துள்ளது. அஜீத்தை வேறு நடிகர்கள் நெருங்கக்கூட வாய்ப்பு இல்லாததால், அவர் மிகவிரைவில் வெற்றி பெற்றதாக அறிவிக்கப்படுவார் என எதிர்பார்க்கப்படுகிறது.
