தினகரன் வழக்கில் கைதாவாரா திருச்சி தொழிலதிபர்?

தினகரன் வழக்கில் கைதாவாரா திருச்சி தொழிலதிபர்?

இரட்டை இலை’ சின்னத்தை மீட்பதற்காக தேர்தல் ஆணைய அதிகாரிகளுக்கு ரூ. 50 கோடி லஞ்சம் கொடுக்க முயன்றதாக டெல்லி போலீசார் பதிந்த வழக்கு தொடர்பான விசாரணைக்காக,டிடிவி தினகரன் சென்னை கொண்டுவரப்பட்டார்.
அவரிடம் நேற்றுமுதல் தொடர்ந்து விசாரணை நடைபெற்று வருகிறது.

இந்நிலையில், இந்த வழக்கு தொடர்பான விசாரணையில் ஈடுபட்டு வரும் காவல்துறை உயரதிகாரி ஒருவர் அளித்துள்ள பேட்டியில், “ரூ.1.3 கோடி கைப்பற்றப்பட்ட சுகேஷ் சந்திரசேகருக்கும், தினகரனுக்கு இடையே உள்ள தொடர்பு குறித்த நேரடி ஆதாரங்கள் எதுவும் இதுவரை எங்களுக்கு கிடைக்கவில்லை. இப்போதுவரை இருவரும் உரையாடிய ஆடியோ ஆதாரம் மட்டுமே எங்களிடம் உள்ளது.

ஆனால், அதில் லஞ்ச வழக்கில் தினகரனுக்கு பங்கு உள்ளது என எந்த விஷயமும் இல்லை. டெல்லி போலீஸ் வரலாற்றிலேயே, ஒரு ஆடியோ டேப்பை ஆதாரமாக வைத்துக் கொண்டு, ஒரு மூத்த அரசியல்வாதி மீது வழக்குப் பதிவு செய்து விசாரணை நடத்துவது அரிதிலும் அரிது.

அனைத்து புலனாய்வு துறைகளிடமும் போன் கால்களை இடைமறித்து கேட்கும் தொழில்நுட்பம் உள்ளது. ஆனால் அந்த ஆடியோ கால்களை ஆதாரமாக வைத்துக் கொண்டு, ஒரு அரசியல்வாதி மீது விசாரணை பதிந்து, அவரை கஸ்டடியில் எடுத்து நாங்கள் இதற்கு முன் விசாரித்ததே இல்லை.

கடந்த டிசம்பர் மாதம் சந்திரசேகர ரெட்டி வீட்டில் ரெய்டு நடத்தப்படுவதற்கு முன், அவரை காப்பாற்றும் முயற்சியில் ஈடுபட்ட அதிமுக தலைவர் ஒருவரின் பல ஆடியோ டேப்கள் எங்கள் வசமுள்ளது. அந்த ரெய்டின் போது ரூ.132 கோடி கைப்பற்றப்பட்டது.

இதற்கிடையில், தாய்லாந்தில் இருந்து டெல்லி திரும்பிய ஹவாலா ஏஜென்ட் நரேஷ் என்பவரையும், டெல்லி போலீசார் கைது செய்தனர். சென்னையிலிருந்து கொச்சி வழியாக டெல்லிக்கு பணத்தை அனுப்ப உதவியதாக அவரை போலீசார் கைது செய்தனர்.

இந்நிலையில், காவல்துறை அதிகாரி அளித்த தகவலில், “இந்த வழக்கில் பெரிய முன்னேற்றமாக, திருச்சியைச் சேர்ந்த தொழிலதிபர் ஒருவர், டெல்லியில் உள்ள ஹவாலா
ஏஜென்டிற்கு பணம் ஏற்பாடு செய்து கொடுத்துள்ளார். அந்த பணம் தான், கைது செய்யப்பட்ட சுகேஷ் சந்திரசேகரிடம் இருந்து கைப்பற்றப்பட்ட பணம்” என்று குறிப்பிட்டுள்ளார்.

ஆடியோ டேப்பை தவிர தினகரனுக்கு எதிரான ஆதாரங்கள் குறித்த கேள்விக்கு பதிலளித்தபோது, ‘கஸ்டடியின் போது சந்திரசேகர் கூறிய தகவல்களால், தினகரனின் கஸ்டடியை ஐந்து நாட்களுக்கு வைத்துக் கொள்ள உதவியது. மேலும், பறிமுதல் செய்யப்பட்ட பணம், தேர்தல் ஆணைய அதிகாரிகளுக்கு கொடுப்பதற்காக இருந்திருக்கலாம் என நாங்கள் சந்தேகிக்கிறோம்” என்றார்

அந்த திருச்சியை சேர்ந்த தொழிலதிபரை தீவிரமாக கண்காணித்தால், பணம் ஏற்பாடு செய்து கொடுப்பதற்காக, அவருக்கும் தினகரனுக்கும், தமிழக அமைச்சர்களுக்கும் உள்ள நேரடி தொடர்புகுறித்த உண்மைகள் கிடைக்கும் என நம்புகிறோம்” என்றார்.