பிரபல பீடி நிறுவனங்களில் வருமான வரித்துறையினர் அதிரடி சோதனை
கடந்த சில மாதங்களாகவே வருமான வரித்துறையினர் அதிரடி சோதனைகளில் ஈடுபட்டு வரும் நிலையில் இன்று காலை நெல்லையை தலைமையிடமாகக் கொண்டு செயல்பட்டு வரும் செய்யது பீடி குழும நிறுவனங்களில் வருமான வரித்துறையினர் அதிரடி சோதனை நடத்தி வருகின்றனர். இதனால் பரபரப்பு ஏற்பட்டுள்ளது.
செய்யது பீடி நிறுவனத்தின் நெல்லை தலைமை அலுவலகம், சென்னை, மதுரை உள்ளிட்ட தமிழ்கத்தின் 40 இடங்களில் வருமானவரி சோதனை நடைபெற்று வருகிறது. செய்யது பீடி நிறுவனத்தின் உரிமையாளர் வீடு மற்றும் அலுவலகங்களில் இன்று காலை 7 மணிக்கு தொடங்கிய இந்த சோதனை மத்திய பாதுகாப்புப் படை வீரர்களின் பாதுகாப்புடன் நடைபெற்று வருகிறது.
முறையாக வரி செலுத்தப்படவில்லை என்ற குற்றச்சாட்டின் அடிப்படையில் இந்த வருமானவரி சோதனை நடைபெறுவதாக தகவல் வெளியாகியுள்ளது. இந்த சோதனையில் சுமார் 300-க்கும் மேற்பட்ட அதிகாரிகள் ஈடுப்பட்டு வருகின்றனர். வருமானவரித்துறை அதிகாரிகள் நடத்திய களஆய்வின் அடிப்படையில் இந்த சோதனை நடைபெறுகிறது. சோதனையின் முடிவில் பல்வேறு ஆவணங்கள் கைப்பற்றப்படலாம் என வருமான வரித்துறை தரப்பில் கூறப்பட்டுள்ளது.
