கதிராமங்கலம் ஓஎன்ஜிசி குழாயில் மீண்டும் உடைப்பு
தஞ்சை மாவட்டாம் கதிராமங்கலத்தில் ஒ.என்.ஜி.சி நிறுவனத்தின் எண்ணெய் குழாயில் வெடிப்பு ஏற்பட்டதால் வயலுக்குள் எண்ணெய் கலந்ததோடு, எண்ணெய்க்குழாயில் தீப்பிடித்து அந்த பகுதி மக்களை அச்சுறுத்தியது.
ஒ.என்.ஜி.சி நிறுவனத்திற்கு எதிர்ப்பு தெரிவித்து அந்த பகுதி மக்கள் கடும் போராட்டங்களை நடத்தி வரும் நிலையில் தற்போது கதிராமங்கலத்தில் ஓ.என்.ஜி.சி. குழாயில் மீண்டும் உடைப்பு ஏற்பட்டுள்ளது. இந்த முறை பெரியகடைத்தெருவில் உள்ள குழாயில் உடைப்பு ஏற்பட்டு கச்சா எண்ணெய் வெளியேறி வருகிறது. ஏற்கனவே ஏற்பட்ட உடைப்பையே இன்னும் சரிசெய்யாத நிலையில் மீண்டும் எண்ணெய்க்குழாயில் உடைப்பு ஏற்பட்டுள்ளது பெரும் பரபரப்பை ஏற்படுத்தியுள்ளது.
உடைப்பை சரிசெய்து எண்ணெய் கசிந்து வருவதை தடுத்த நிறுத்த ஒ.என்.ஜி.சி நிறுவனத்தின் பணியாளர்கள் ஈடுபட்டு வருவதாகவும், விரைவில் எண்ணெய்க்கசிவு நிறுத்தப்படும் என்றும் கூறப்படுகிறது.
