முதன்முதலாக மத்திய அரசை எதிர்த்து கமல் கண்டனம்
கமல்ஹாசன் இதுவரை மாநில அரசை மட்டுமே விமர்சனம் செய்து வருவதாகவும், மத்திய அரசின் தவறுகளை கண்டுகொள்வதில்லை என்றும் விமர்சனங்கள் எழுந்த நிலையில் காவிரி விவகாரத்தில் சர்ச்சைக்குரிய கருத்து தெரிவித்த மத்திய அமைச்சரை கண்டித்து கமல் அறிக்கை ஒன்றை வெளியிட்டுள்ளார். இதன்மூலம் அவர் மத்திய அரசையும் விமர்சனம் செய்ய தொடங்கிவிட்டார் என்பது குறிப்பிடத்தக்கது
காவிரி விவகாரத்தில் உச்சநீதிமன்றம் உத்தரவிட்டுள்ள காவிரி மேலாண்மை வாரியம் அமைப்பது எளிதான காரியம் அல்ல என்று கூறிய மத்திய அமைச்சர் நிதின் கட்கரி சமீபத்தில் பேட்டியளித்திருந்தார். இதற்கு கண்டனம் தெரிவித்து கமல் கட்சியான மக்கள் நீதி மய்யம் வெளியிட்டுள்ள அறிக்கையில் கூறியிருப்பதாவது:
உச்சநீதி மன்ற நீதிபதி உட்பட மூன்று நீதிபதிகள் கொண்ட அமர்வு ஆறு வாரங்களுக்குள் காவிரி மேலாண்மை வாரியம் அமைக்க வேன்டும் என்று தீர்ப்பளித்திருக்கிறது. ஆனால், அதை நடைமுறைப்படுத்த இயலாது என்று மத்திய அமைச்சர் நிதின் கட்கரி அறிவித்திருப்பது கண்டனத்திற்குரியது. காவிரிப் படுகையை ஒரு எண்ணேய் பீப்பாயாக மாற்றும் முயற்சிக்கு துணைப் போகும் விதமாகப் பேசுவதும், நடந்து கொள்வது ஏற்புடையதல்ல.
சட்டத்தின் ஆட்சியை நடத்த, அரசு தவறுகிற போதெல்லாம் நீதி மன்றங்களை நாடுகின்றோம். நீதி மன்றங்களின் தீர்ப்பையும் அரசு செயல்படுத்த மறுத்தால் நீதி கேட்டு எங்கே செல்வது? யாரிடம் முறையிடுவது? என்கிற உணர்வு தோன்றுமானால் அது குடியரசுக்கும், நீதி அமைப்பிற்கும் பெருமை சேர்க்காது.
எனவே, உச்சநீதி மன்றத் தீர்ப்பை மதித்து, மத்திய அரசு காவிரி மேலாண்மை வாரியம் அமைப்பதற்கான உத்தரவை ஆறு வாரங்களுக்குள் வெளியிட வேண்டும்”;
இவ்வாறு அந்த அறிக்கையில் குறிப்பிடப்பட்டுள்ளது.
