பாபா ராம்தேவ் அறிமுகம் செய்யும் பதஞ்சலி சிம்கார்டு: ஜியோவுக்கு போட்டியா?
யோகா குரு பாபா ராம்தேவ் அவர்களின் பதஞ்சலி தயாரிப்புகள் ஏற்கனவே இந்தியா முழுவதும் பிரபல அடைந்துள்ள நிலையில் தற்போது பிஎஸ்என்எல் நிறுவனத்துடன் இணைந்து சிம்கார்டு ஒன்றை அவர் அறிமுகப்படுத்தியுள்ளார்
சுதேசி சம்ரதி என்ற பெயரில் அறிமுகம் செய்யப்படும் இந்த சிம்கார்டை வாங்கி 144 ரூபாய் ரீசார்ஜ் செய்தால் அதற்கு, அன்லிமிட்டேட் போன் கால், 100 எஸ்எம்எஸ் மற்றும் 2ஜிபி இண்டெர்நெட் சேவை கிடைக்கும். மேலும், மருத்துவ காப்பீடு, ஆயுள் காப்பீடு வசதிகளும் ஏற்படுத்தப்படவுள்ளது. இந்த சுதேசி சம்ரதி சிம்கார்டு மூலம் வாடிக்கையாளர்கள் 10 சதவீத தள்ளுபடியில் பதஞ்சலி தயாரிப்புகளை வாங்கிக்கொள்ளலாம்.
யோகா குரு பாபா ராம் தேவ், பதஞ்சலி எனும் பெயரில் டூத் பேஸ்ட், கோதுமை, ஹேர் ஆயில் என பலசரக்கு பொருட்களை தயாரித்து விற்பனை செய்து வருகிறார். ஆன்லைனிலும், தனித்தனியாக ஷோ ரூம்களை அமைத்தும் இந்தியா முழுவதும் இவருடைய பொருட்கள் பிரபலமாகியுள்ளது.
இது குறித்து நேற்று நிகழ்ச்சி ஒன்றில் பங்கேற்று பேசிய பாபா ராம்தேவ், பதஞ்சலி – பிஎஸ்என்எல் இணைந்து நாட்டின் நன்மைக்காக நவீன சுதேசி இயக்கத்தை துவங்கியுள்ளது என்றும், இந்த சிம்கார்டுடன் 2.5 லட்சம் ரூபாய்க்கு மருத்துவ காப்பீடு மற்றும் 5 லட்சம் ரூபாய்க்கு ஆயுள் காப்பீடு கிடைக்கும் என்றும் தெரிவித்தார்.
மேலும் இப்போதைக்கு இந்த சிம்கார்டு பதஞ்சலி ஊழியர்களுக்கு மட்டும் வழங்கப்படுவதாகவும் , விரைவில் பொதுமக்களுக்கும் அறிமுகம் செய்யப்படும் என்றும் அவர் கூறினார்
