பெங்களூரில் மும்முனை போட்டி: பிரகாஷ்ராஜூக்கு வெற்றி கிடைக்குமா?>
பெங்களூரு மத்திய மக்களவை தொகுதியில் நடிகர் பிரகாஷ்ராஜ் சுயேசையாகவும், பாஜக சார்பில் தொடர்ந்து மூன்றாவது முறையாக பி.சி.மோகனும், காங்கிரஸ் சார்பில் ரிஷ்வான் ஆசாத்தும் களம் இறங்கியுள்ளனர். பிரகாஷ்ராஜூக்கு காங்கிரஸ் கட்சி ஆதரவு தரும் என எதிர்பார்க்கப்பட்ட நிலையில் காங்கிரஸ் வேட்பாளரை அறிவித்துள்ளதால் இங்கு பாஜகவுக்கும் காங்கிரஸ் கட்சிக்கும் இடையேதான் போட்டி என்று கூறப்படுகிறது.
இருப்பினும் சுயேட்சையாக களமிறங்கும் நடிகர் பிரகாஷ்ராஜ் மத்தியில் ஆளும் பாஜக அரசுக்கு மக்கள் சரியான பாடம் புகட்டுவார்கள் என்று நம்பிக்கை தெரிவித்துள்ளார். கடந்த இரண்டு மாதங்களாக நடிகர் பிரகாஷ்ராஜ் தொகுதி முழுவதும் சுற்றி வந்து அங்குள்ள பிரச்சினைகள் குறித்து தனது குழுவை வைத்து முழுமையாக ஆராய்ந்து, வெற்றி பெற்றால் என்ன செய்வேன் என்று வாக்குறுதி அளித்து வருகிறார்.
இந்த தொகுதியில் தமிழ் வாக்காளர்கள் சுமார் 6 லட்சம் பேர்களும், 2 லட்சம் தெலுங்கு மொழி பேசும் வாக்காளர்களும், வேறு மாநிலங்களில் இருந்து குடிபெயர்ந்தவர்கள் மற்றும் கேரளாவைச் சேர்ந்தவர்கள் என சுமார் 5 லட்சம் வாக்காளர்களும் உள்ளனர். இவர்களுடைய வாக்குகள் தான் இந்த தொகுதியின் வெற்றியை நிர்ணயிக்கும் என்று கூறப்படுகிறது
