பிரபல இயக்குனரும், நடிகருமான டி.ராஜேந்தர் அவர்களின் தங்கை மகன் உள்பட நான்கு பேர் விழுப்புரம் மாவட்டம், மரக்காணம் அருகே இரண்டு கார்கள் நேருக்கு நேர் மோதிக்கொண்ட விபத்தில் பரிதாபமாக பலியாகினர்.
டி.ராஜேந்தரின் உடன்பிறந்த தங்கை தங்கை சேமலதா. இவருடைய மகன் 22 வயது ஆதிகுரு சினிமா உதவி இயக்குனராக பணியாற்றி வந்தார். கடந்த வாரம் இவர் சென்னையில் இருந்து தனது தாயாரை பார்க்க மயிலாடுதுறை வந்திருந்தார். பின்னர் மீண்டும் சென்னை புறப்படுவதற்காக தனது டாடா இண்டிகா காரில் மயிலாடுதுறையில் இருந்து புறப்பட்டார். அவருடன் அவருடைய உறவினர்கள் பிரியதர்சினி (29), ஓய்வு பெற்ற ராணுவ வீரர் விஜயராகவன் (52) ஆகியோர் இருந்தனர். காரை விஜயராகவன் என்பவர் ஓட்டிவந்தார்.
நேற்று அதிகாலை 4 மணியளவில் மரக்காணம் அருகே உள்ள செட்டிக்குப்பம் என்ற இடத்தில் கார் மிக வேகமாக வந்து கொண்டிருந்தது. அப்போது சென்னையில் இருந்து புதுச்சேரி நோக்கி சென்று கொண்டிருந்த மற்றொரு காருடன் கண்இமைக்கும் நேரத்தில் மோதியதால் பயங்கர விபத்து ஏற்பட்டது. இந்த விபத்தில் இரண்டு கார்களும் அப்பளம் போல நொறுங்கியதால் இடுபாடுகளுக்கு இடையே சிக்கி டி.ராஜேந்தரின் தங்கை மகன் ஆதிகுரு உள்பட நான்கு பேர்களும் பரிதாபமாக சம்பவ இடத்திலேயே பலியாகினர்
தகவல் அறிந்ததும் டி.ராஜேந்தர் குடும்பத்தினர் மரக்காணம் விரைந்துள்ளனர். இந்த விபத்து குறித்து மரக்காணம் காவல்துறையினர் வழக்குப் பதிவு செய்து விசாரணை நடத்தி வருகின்றனர்.
