வேலை வாங்கி தருவதாக ஏமாற்றி பல இளைஞர்களிடம் லட்சக்கணக்கில் பணமோசடி செய்து அந்த பணத்தில் திரைப்படம் தயாரித்த ஒரு கும்பலை கூண்டோடு கண்டுபிடித்து காவல்துறையினர் கைது செய்துள்ளனர்.
தெலுங்கில் Cool Boys – Hot Girls” என்ற திரைப்படத்தை தயாரித்து வரும் INS Raju மற்றும் இந்த படத்தின் இயக்குனர் Devudu ஆகியோர்களுடன் இந்த படத்தில் நடிக்கும் புதுமுக நடிகர்கள் மற்றும் நடிகைகள் கொண்ட கும்பல் ஒன்று போலியான வேலைவாய்ப்பு கம்பெனி ஒன்றை ஆரம்பித்து அதன் மூலம் பல இளைஞர்களுக்கு வேலை வாங்கித்தருவதாக லட்சக்கணக்கில் மோசடி செய்துள்ளது. அந்த மோசடி பணத்தில் திரைப்படம் எடுத்து வருவதாக ஆந்திர போலீசாருக்கு வந்த புகாரை அடுத்து ஆந்திர போலீசார் விசாரணை செய்தனர். விசாரணையில் இந்த படத்தின் இயக்குனர் மற்றும் தயாரிப்பாளர் போலி நிறுவனம் நடத்தியது உறுதிப்படுத்தப்பட்டதால், அவர்கள் இருவர் உள்பட படத்தில் நடிக்கும் சில நடிகர்களும் கூண்டோடு கைது செய்யப்பட்டனர்.
இதுவரை ரூ.17 லட்சம் மோசடி செய்துள்ளதாக புகார்கள் வந்துள்ளது என்றும் இன்னும் பல புகார்கள் வர வாய்ப்பு இருக்கின்றது என்றும் காவல்துறையினர் கூறினர். மோசடி செய்த பணத்தின் மூலம் இவர்கள் Indraganti Creative Movies என்ற சினிமா கம்பெனியை ஆரம்பித்து Cool Boys – Hot Girls” என்ற திரைப்படத்தை எடுத்து வந்துள்ளார்கள் என்பதும் விசாரணையில் தெரிய வந்துள்ளது.
