ஆந்திர மாநிலத்தில் நகரி அருகே உள்ள ஒரு கோவில் திருவிழாவில் கலந்து கொள்ள வருகை தந்த நடிகையும், நகரி தொகுதியும் எம்.எல்.ஏவுமான நடிகை ரோஜாவை மர்ம நபர் ஒருவர் கத்தியால் தாக்கியதால் அப்பகுதியில் பெரும் பரபரப்பு ஏற்பட்டுள்ளது.
நகரி அருகே நேற்று ஒரு அம்மன் கோவிலில் திருவிழா நடந்தது. இதில் தொகுதி எம்.எல்.ஏ என்ற முறையில் நடிகை ரோஜா கலந்து கொண்டார். அந்த கோவிலின் பூசாரி ரோஜாவுக்கு முதல்மரியாதை அளிக்க முன்வந்தபோது, தெலுங்கு தேச எம்.எல்.ஏ ஒருவர் இதற்கு எதிர்ப்பு தெரிவித்தார். அந்த பகுதியில் உள்ள பெரியவர் ஒருவருக்குத்தான் முதல் மரியாதை செய்ய வேண்டும் என்றும் ரோஜாவுக்கு முதல் மரியாதை கொடுக்க கூடாது என்றும் எதிர்ப்பு தெரிவிக்கப்பட்டது.
இந்த களேபரத்தில் மர்ம நபர் ஒருவர் கத்தியால் ரோஜாவின் கையை கீறிவிட்டு தப்பியோடிவிட்டார். இதனால் அந்த பகுதியில் பெரும் பதட்டம் ஏற்பட்டது. உடனடியாக மருத்துவர் ஒருவர் விரைந்து வந்து ரோஜாவின் கைகளுக்கு கட்டுபோட்டார்.
நகரி தொகுதி எம்.எல்.ஏ ரோஜாவை தாக்கியவரை உடனடியாக கைது செய்ய வலியுறுத்தி ரோஜாவின் ஆதரவாளர்கள் ஆர்ப்பாட்டம் செய்தனர். பின்னர் போலீஸார் அவர்களை சமாதானப்படுத்தியதோடு ரோஜாவுவை பலத்த பாதுகாப்புடன் அனுப்பி வைத்தனர்.
