அஜீத்தின் ‘என்னை அறிந்தால்’ திரைப்படத்தின் தயாரிப்பாளர் ஏ.எம்.ரத்னம் அவர்களின் பி.ஆர்.ஓ இன்று செய்தியாளர்களிடம் தெரிவித்தபோது, ‘என்னை அறிந்தால் திரைப்படம் கண்டிப்பாக பொங்கல் தினத்தில் அதாவது ஜனவரி 15ஆம் தேதி திரையிடப்படும். இந்த முடிவில் இருந்து எந்த காரணத்தை முன்னிட்டும் பின்வாங்கும் பேச்சுக்கே இடமில்லை என்று கூறினார்.
கடந்த இரண்டு நாட்களாக ‘என்னை அறிந்தால்’ படத்தின் படப்பிடிப்பே இன்னும் முடியவில்லை. அதன்பின்னர் போஸ்ட் புரடொக்ஷன் பணிகளை முடித்துவிட்டு பொங்கலுக்கு என்னை அறிந்தால் படம் வெளிவருவது சந்தேகம் என்ற வகையில் ஒருசில ஊடகங்கள் செய்தி வெளியிட்டு வந்தன. இதற்கு அதிகாரபூர்வமாக பதிலளித்துள்ள தயாரிப்பு நிறுவனம், போஸ்ட் புரடொக்ஷன் பணிகள் ஒருபுறம் விறுவிறுப்பாக நடைபெற்று வருவதாகவும், படப்பிடிப்பு நேற்று முன் தினத்துடன் முடிந்துவிட்டதாகவும் கூறியுள்ளது.
ஜனவரி 1ஆம் தேதி டிரைலர் வெளியிட இருப்பதாகவும், அதற்கடுத்த ஒருசில் நாட்களில் பாடல் வெளியீட்டு விழா நடைபெறும் என்றும் அவர் தெரிவித்தார்.
ஆனால் அதே நேரத்தில் ஷங்கரின் ‘ஐ’ திரைப்படம் சென்னையின் முக்கிய திரையரங்குகளான சத்யம், ஐநாக்ஸ், தேவி, ஆல்பர்ட், அபிராபி, உதயம், பிவிஆர், ஏஜிஎஸ் போன்ற மல்டிபிளக்ஸ் தியேட்டர்களில் உள்ள அனைத்து திரைகளிலும் ‘ஐ’ திரைப்படம் வெளியிட உள்ளதாக விளம்பரங்கள் வந்துள்ளன. இதை மீறி என்னை அறிந்தால் படத்திற்கு எப்படி தியேட்டர் கிடைக்கும் என்பது புரியாத புதிராக உள்ளது.
