ஸ்ரீரங்கம் தொகுதிக்கு பிப்ரவரி 13ஆம் தேதி இடைத்தேர்தல் நடைபெறும் என நேற்று தேர்தல் ஆணையம் அதிகாரபூர்வமாக அறிவிப்பு செய்ததை அடுத்து திமுக தலைவர் கருணாநிதி முதல் ஆளாக ஸ்ரீரங்கம் தொகுதியின் திமுக வேட்பாளரை அறிவித்துள்ளார். இதனால் தேர்தல் களம் விறுவிறுப்பு அடைந்துவிட்டதாக கூறப்படுகிறது.
ஸ்ரீரங்கம் சட்டப்பேரவை தொகுதி இடைத்தேர்தலில் தி.மு.க. சார்பில் என்.ஆனந்த் போட்டியிடுவார் என்று அக்கட்சித் தலைவர் கருணாநிதி இன்று அறிவித்துள்ளார். ஆனந்த் ஏற்கனவே கடந்த சட்டமன்ற தேர்தலில் ஜெயலலிதாவை எதிர்த்து போட்டியிட்டு தோல்வி அடைந்தவர் என்பது குறிப்பிடத்தக்கது.
வழக்கமாக அனைத்து தேர்தல்களிலும் அதிமுக பொதுச்செயலாளர் ஜெயலலிதாதான் முதல் ஆளாக வேட்பாளர் பெயரை அறிவிப்பார். ஆனால் அவர் நின்ற தொகுதியிலேயே அவருக்கு முன்பாக இன்னொரு கட்சி வேட்பாளரை அறிவித்துள்ளது என்பது குறிப்பிடத்தக்கது.
