ஒரு மாதம் கழித்து மீண்டும் ரிலீஸ் ஆகிறது ‘என்னை அறிந்தால்’

இன்று உலகம் முழுவதும் ரிலீஸாகியுள்ள ‘என்னை அறிந்தால்’ திரைப்படத்தை ஒரு மாதம் கழித்து மீண்டும் ஒருமுறை புதுப்பொலிவுடன் ரிலீஸ் செய்ய கவுதம் மேனன் முடிவு செய்திருப்பதாக செய்திகள் தெரிவிக்கின்றன.

கெளதம் மேனன் இயக்கத்தில் இன்று வெளியாகியுள்ள ‘என்னை அறிந்தால்’ படத்தில் அஜித், அனுஷ்கா, த்ரிஷா, அருண் விஜய் உள்ளிட்ட பலர் நடித்திருக்கின்றனர். ‘இந்த படம் சென்சார் சான்றிதழ்படி படம் 3 மணி நேரம் 8 நிமிடம் ஓடுகிறது.

ஆனால் சமீபத்தில் வெளியான லிங்கா, ஐ போன்ற படங்கள் மிகவும் நீளமாக இருந்ததாக வந்த நெகட்டிவ் கருத்துக்களை அடுத்து படத்தின் நீளத்தை குறைக்க கவுதம் மேனன் முடிவு செய்தார். இதனால் அவர் முதலில் சுமார் 15 நிமிடக் காட்சிகளை குறைத்தார்.

இதனால், படத்தின் நீளம் 2:46 நிமிடம்தான் என்று அறிவிக்கப்பட்டது. அதன்படி, முதல் 3 நிமிடம் டைட்டில் கார்டு, இறுதி 3 நிமிடம் டைட்டில் கார்டு என 6 நிமிடங்கள் கழித்தால் மொத்தம் 2:40 நிமிடங்கள்  ‘என்னை அறிந்தால்’ படம் ஓடுகிறது.

ஆனால் ‘என்னை அறிந்தால்’ படத்திற்கு  நல்ல வரவேற்பு கிடைத்தால் சென்சார் செய்யப்பட்ட 3 மணி நேரம் 8 நிமிடக் காட்சிகள் கொண்ட முழுமையான படத்தை ஒரு மாதம் கழித்து மீண்டும் வெளியிட திட்டமிட்டு இருப்பதாக இயக்குநர் கெளதம் வாசுதேவ் மேனன் தெரிவித்துள்ளார்.