அமெரிக்காவில் உள்ள அலாஸ்கா ஏர்லைன்ஸ் விமானம் ஒன்று கடந்த சனிக்கிழமை இரவு லாஸ்ஏஞ்சல்ஸ் நகரில் இருந்து போர்ட் லேண்ட் நகருக்கு பயணம் செய்தது. இந்த விமானத்தில் ஏராளமான பயணிகள் இருந்தனர். விமானம் லாஸ்ஏஞ்சல்ஸ்சில் இருந்து புறப்பட்ட சிறிது நேரத்தில் விமானத்தில் இருக்கையில் அமர்ந்திருந்த ஒரு பெண்ணின் கையில் விஷத்தன்மையுள்ள தேள் கொட்டியது. இதனால் வலியால் துடிதுடித்த அந்த பெண்B அலறினார். இதனால் விமானம் மீண்டும் லாஸ்ஏஞ்சல்ஸ் நகருக்கு திருப்பப்பட்டது.
லாஸ் ஏஞ்சல்ஸ் நகரில் தேள் கொட்டிய பெண்ணுக்கு முதலுதவி சிகிச்சை அளிக்கப்பட்டு அதன்பின்னர் மருத்துவமனையில் அனுமதிக்கபட்டார். அன்னி சிம்மொன் என்ற பெயருடைய அந்த பெண்ணின் நடுவிரலில் தேள் கொட்டியதாகவும், தற்போது அவர் குணமடைந்து வருவதாகவும், நடந்த துரதிர்ஷ்டமான சம்பவத்திற்கு வருத்தம் தெரிவித்துக்கொள்வதாகவும் அலாஸ்கா ஏர்லைன்ஸ் விமான நிறுவனம் தெரிவித்துள்ளது.
இந்த சம்பவத்திற்கு பின்னர் விமானத்துக்குள் இது போன்று வேறு நச்சு பூச்சிகள் உள்ளனவா? என சோதனையிடப்பட்ட பின்னர் அந்த விமானம் சற்று நேரத்தில் மீண்டும் போர்ட்லேண்ட் நோக்கி சென்றது.
