ஷங்கர் இயக்கிய ஜெண்டில்மேன், ரஜினி நடித்த முத்து, உள்பட பல படங்களில் நடித்த நடிகை சுபாஸ்ரீயின் சகோதரி மாலாஸ்ரீ கன்னடத்தில் பிரபல நடிகை என்பது குறிப்பிடத்தக்கது. சமீபத்தில் மாலாஸ்ரீக்கு கொலை மிரட்டல் வந்துள்ளதாகவும், இதுகுறித்து அவர் காவல்நிலையத்தில் புகார் அளித்துள்ளதாகவும் செய்திகள் வெளிவந்துள்ளன,
சென்னையை சேர்ந்த நடிகை மாலாஸ்ரீ கன்னடம் மற்றும் தெலுங்கு மொழிகளில் பல படங்களில் நடித்தவர். பிரபல திரைப்பட தயாரிப்பாளர் ராமுவை திருமணம் செய்துகொண்ட இவருக்கு அனன்யா என்ற மகள் உள்ளார்.
நடிகை மாலாஸ்ரீக்கு சொந்தமான சொத்துக்களை சமீபத்தில் அவர் விற்க முயன்றதாகவும் இதுகுறித்து ஏற்பட்ட பிரச்சனையால் அவருக்கு கொலை மிரட்டல் வந்துள்ளதாகவும் செய்திகள் வெளிவந்துள்ளன. மர்ம நபர்கள் சிலர் தனக்கு போன் செய்து தனது முகத்தில் ஆசிட் வீசவுள்ளதாகவும், கொலை செய்யவுள்ளதாகவும் மிரட்டல் விடுத்துள்ளதாக அவர் காவல்நிலையத்தில் புகார் செய்துள்ளார்.
மாலாஸ்ரீயின் புகார் குறித்து காவல்துறையினர் விசாரணை செய்து நடவடிக்கை எடுத்து வருவதாக கூறப்படுகிறது.
