சூப்பர் ஸ்டார் ரஜினி நடிக்கும் படத்தை ரஞ்சித் இயக்கவுள்ளார் என்பது உறுதியாகிவிட்டதால், இந்த படத்தில் நடிக்கவுள்ள மற்ற நடிகர் நடிகைகளின் தேர்வு மிக வேகமாக நடந்து வருகின்றதாம். இந்த படத்தில் ஒரு பெரிய நட்சத்திர பட்டாளமே நடிக்கவுள்ளதாகவும், அவர்களிடம் கால்ஷீட் வாங்கும் பணிகள் விரைவாக நடந்து வருவதாகவும், எந்த நேரத்திலும் படப்பிடிப்பிற்கு தயாராக இருக்குமாறு அவர்களிடம் தெரிவிக்கப்பட்டிருப்பதாகவும் தகவல்கள் கூறுகின்றன.
முதல்கட்டமாக ரஜினிக்கு ஜோடியாக நடிக்கும் நடிகையின் தேர்வு நடந்து வருவதாகவும், அனேகமாக பிரபல பாலிவுட் நடிகை ஒருவர் ரஜினிக்கு ஜோடியாக நடிக்க வாய்ப்பு இருப்பதாகவும், அவரிடம் முக்கிய நபர் ஒருவர் பேச்சுவார்த்தை நடத்தி வருவதாகவும் கூறப்படுகிறது.
முதல்கட்ட படப்பிடிப்பு மலேசியாவில் ஒரு மாதம் நடக்கவுள்ளது என தெரிகிறது. மேலும் இந்த படத்தை கலைப்புலி எஸ்.தாணு தயாரிக்க இருப்பதாக அறிவிப்பு வெளிவந்தபோதிலும், அவர் பிரபல கார்ப்பரேட் நிறுவனம் ஒன்றுக்காக முதல்பிரதி அடிப்படையில் தயாரித்து தர சம்மதித்துள்ளதாகவும் செய்திகள் வெளிவந்துள்ளன. ஆனால் படக்குழுவினர் இந்த தகவலை மறுத்துள்ளனர். இந்த படத்தை தயாரிப்பது தாணுதான் என்று அவர்கள் அடித்து கூறுகின்றனர்.
