பாலிடெக்னிக் கல்லூரிகளில், வரும் கல்வியாண்டில் (2015-16) முதலாமாண்டு பட்டயப் படிப்பில் (டிப்ளமோ) சேருவதற்கான விண்ணப்பம் இன்று முதல் விநியோகிக்கப்படுகின்றன.
இப்படிப்புக்கு பத்தாம் வகுப்பு அல்லது அதற்கு இணையான படிப்பில் தேர்ச்சி பெற்ற மாணவர்களிடமிருந்து விண்ணப்பங்கள் வரவேற்கப்படுகின்றன.
ஜூன் 5-ஆம் தேதி வரை விண்ணப்பங்கள் விநியோகிக்கப்படும். பூர்த்தி செய்யப்பட்ட விண்ணப்பங்கள் ஜூன் 5 ஆம் தேதிக்குள் அனுப்பப்பட வேண்டும்.
மொத்தம் 41 அரசு தொழில்நுட்பக் கல்லூரிகளில் வேலை நாள்களில் காலை 10 மணி முதல் மாலை 5 மணி வரை விண்ணப்பங்கள் விநியோகிக்கப்படும்.
அஞ்சல் மூலமாகவும் பெறலாம்: தொழிற்படிப்பு இடையே புகுத்தப்பட்ட பட்டயப் படிப்புகளுக்கான விண்ணப்பங்களும் அத்தகைய படிப்பு நடத்தப்படும் பாலிடெக்னிக் கல்லூரிகளில் மேற்குறிப்பிட்ட நாள்களில் வழங்கப்படும்.
மாணவர்கள் தங்கள் வசிப்பிடத்துக்கு அருகே உள்ள அரசு பாலிடெக்னிக் கல்லூரிகளில் மே மாதம் 18-ஆம் தேதி முதல் விண்ணப்பங்களை நேரில் பெற்றுக் கொள்ளலாம். ஒரு விண்ணப்பத்தின் விலை ரூ.150 ஆகும்.
நேரில் விண்ணப்பம் பெற விரும்புவோர் ரூ.150-ஐ ரொக்கமாகச் செலுத்தியும், அஞ்சல் மூலம் பெற விரும்புவோர் ரூ.150-க்கான கோடிட்ட வங்கி கேட்பு வரைவோலை (டி.டி) தொடர்புடைய கல்லூரியின் “முதல்வர்” பெயரில் எடுத்து, சுய முகவரியுடன் 30 செ.மீ.ல2.5 செ.மீ. அளவுள்ள அஞ்சல் உறையில் ரூ.15-க்கான தபால் தலை ஒட்டி அனுப்பி பெற்றுக் கொள்ளலாம்.
தாழ்த்தப்பட்டோர், பழங்குடியினருக்கு: தமிழகத்தைச் சேர்ந்த பட்டியல் இனத்தவர், பழங்குடியினருக்கு விண்ணப்பக் கட்டணத்திலிருந்து விலக்கு அளிக்கப்படுகிறது. அவர்கள் ஜாதிச் சான்றிதழின் சான்றொப்பமிட்ட நகலைச் சமர்ப்பித்து விண்ணப்பத்தினை இலவசமாகப் பெற்றுக் கொள்ளலாம். மேலும், விண்ணப்பத்தினை www.tndte.com என்ற இணையதளத்திலிருந்தும் மே மாதம் 18-ஆம் தேதி முதல் பதிவிறக்கம் செய்து கொள்ளலாம்.
பூர்த்தி செய்யப்பட்ட விண்ணப்பப் படிவங்கள் ஜூன் 5-க்குள் அந்தந்த அரசு பாலிடெக்னிக் தொழில்நுட்பக் கல்லூரிகளுக்கு வந்து சேரும்படி விண்ணப்பிக்கலாம்.
