தனுஷ் நடித்த மாரி’ திரைப்படம் வரும் 17ஆம் தேதி ரிலீஸ் ஆகவுள்ளது. ஏற்கனவே ரிலீஸான பாபநாசம், பாகுபலி ஆகிய இரண்டு படங்களும் நல்ல வசூலுடன் ஓடிக்கொண்டிருப்பதால், மாரி திடைப்படத்திற்கு குறைவான அளவே தியேட்டர் கிடைத்திருப்பதாக கூறப்படுகிறது.
இதை முதலிலேயே எதிர்பார்த்த தயாரிப்பாளர் ராதிகா சரத்குமார், ரிலீஸை ஒரு வாரத்திற்கு தள்ளி வைக்க முடிவு செய்ததாகவும், ஆனால் தனுஷ் கண்டிப்பாக திட்டமிட்டபடி ஜூலை 17ல் ரிலீஸ் செய்ய வேண்டும் என வற்புறுத்தியதாகவும் கூறப்படுகிறது. தனுஷின் இந்த வற்புறுத்தலுக்கு காரணம், சரியாக ஒரு ஆண்டுக்கு முன்னர் அதாவது 2014ஆம் ஆண்டு ஜூலை 18ஆம் தேதி, அவர் நடித்த ‘வேலையில்லா பட்டதாரி’ ரிலீஸ் ஆகி சூப்பர் ஹிட் ஆகியது என்பதுதான்.
வேலையில்லா பட்டதாரி வெளியான அதே தேதியில் தன்னுடைய மாரி’ திரைப்படமும் வெளிவர வேண்டும் என்ற செண்டிமெண்ட் காரணமாக இந்த தேதியில் மாரி படம் வெளிவர வேண்டும் என தனுஷ் பிடிவாதமாக இருந்ததாக கூறப்படுகிறது. மேலும் இந்த படத்தின் சாட்டிலைட் உரிமையையும் தனுஷே வாங்கியுள்ளார் என்பது குறிப்பிடத்தக்கது.
தனுஷ், காஜல் அகர்வால், விஜய் ஜேசுதாஸ், ரோபோ ஷங்கர் உள்பட பலர் நடித்துள்ள இந்த படத்திற்கு அனிருத் இசையமைத்துள்ளார். பாலாஜி மோகன் இந்த படத்தை இயக்கியுள்ளார்.
