டெல்லி சிபிஐ தலைமை அலுவலகத்தில் திடீர் தீ விபத்து
டெல்லியில் உள்ள சிபிஐ தலைமை அலுவலகம்ம், பல முக்கிய வழக்குகளை விசாரணை செய்து வரும் நிலையில் இன்று காலை சுமார் 11 மணியளவில் அந்த அலுவலகத்தில் திடீர் தீ விபத்து ஏற்பட்டுள்ளது.
இந்த விபத்து பற்றிய தகவல் கிடைத்தவுடன் உடனடியாக புதுடெல்லி தீயணைப்பு படையை சேர்ந்த 7 தீயணைப்பு வாகனங்கள் சம்பவ இடத்துக்கு விரைந்தன. சி.பி.ஐ. தலைமை அலுவலக கட்டிடத்தில் இருந்த ஏசி மிஷினில் இருந்து கிளம்பிய தீப்பொறியால் இந்த விபத்து நேர்ந்திருக்கலாம் என முதல்கட்ட விசாரணையில் தெரிய வந்துள்ளது.
கட்டிடத்தின் இதர பகுதிகளுக்கு பரவி விடாதபடி உடனடியாக தீயை கட்டுப்படுத்திய தீயணைப்பு படை வீரர்கள், தீயை முழுவதுமாக அணைக்கும் பணியில் ஈடுபட்டு வருகின்றனர். இந்த பணியில் மொத்தம் 100க்கும் அதிகமான தீயணைப்பு வீரர்கள் செயல்பட்டு வருகின்றனர். இந்த விபத்தால் ஏற்பட்ட உயிர், உடமை சேதம் தொடர்பான தகவல்கள் எதுவும் இன்னும் வெளியாகவில்லை.
