பத்ம விருது பெற்ற ரஜினிக்கு நடிகர் சங்கம் பாராட்டு
சூப்பர் ஸ்டார் ரஜினிகாந்த் அவர்களுக்கு கடந்த திங்கட்கிழமை இந்தியாவின் மிக உயரிய விருதுகளில் ஒன்றான பத்ம விபூஷன் விருது அறிவிக்கப்பட்டது என்பது அனைவரும் அறிந்ததே. ரஜினிக்கு இந்த விருது அறிவிக்கப்பட்டதும் சந்திரபாபு நாயுடு, கருணாநிதி உள்பட பல அரசியல் தலைவர்களும், சரத்குமார் உள்பட பல திரையுலக பிரபலங்களும் அவருக்கு வாழ்த்து கூறினர். இந்நிலையில் நடிகர்சங்க நிர்வாகிகளும் ரஜினிகாந்துக்கு வாழ்த்தும் பாராட்டும் தெரிவித்து அறிக்கை ஒன்றை வெளியிட்டுள்ளது.
நடிகர் சங்கம் வெளியிட்ட அறிக்கையில் கூறப்பட்டுள்ளதாவது: பல வருட உழைப்பு கடின முயற்சிக்கு பிறகு தினம் தினம் செய்திகளாக மாறி நிற்கும் அளவிற்கு வளர்ந்துவிட்ட ரஜினிகாந்துக்கு மக்கள் தந்த வெற்றியும் விருதுகளுமே அங்கீகாரமாகும். இது வளர்ந்து வரும் கலைஞர்களுக்கு மட்டுமல்ல வளர்ந்து நிற்கும் கலைஞர்களுக்கும் பொருந்தும்.
அதோடு திரை உலக பாராட்டுக்களையும் விருதுகளையும் தாண்டி சமூக அங்கீகாரம் கிடைக்கும்போதுதான், அந்த கலைஞன் உச்சம் பெறுகிறார். அந்த வகையில் உலக தமிழர்களும் இந்தியர்களும் சூப்பர் ஸ்டார் என கொண்டாடப்படும் கலைஞராக உள்ள ரஜினிகாந்த், இந்திய அரசின் உயரிய பத்ம விபூஷன் விருதை பெறுவதில் தென்னிந்திய நடிகர் சங்கம் பெருமிதம் கொள்கிறது. காலம் தன்னிடம் உள்ள அருட்கொடைகள் அனைத்தையும் கொடுத்து அவரை ஆசிர்வதிக்கட்டும்.
