விடுதலை ஆனார் சஞ்சய்தத்.
கடந்த 1993ஆம் ஆண்டில் நிகழந்த மும்பை தொடர் குண்டுவெடிப்பு வழக்கில் 5 வருடங்கள் சிறைத் தண்டனை பெற்ற நடிகர் சஞ்சய்தத் சற்று முன் விடுதலை செய்யப்பட்டார். அவரை வரவேற்க அவரது குடும்பத்தினர் மற்றும் நண்பர்கள் சிறை வாசலில் காத்திருந்ததாக செய்திகள் வெளியாகியுள்ளது.
மும்பையில் கடந்த 1993 ம் ஆண்டு நடந்த தொடர் குண்டுவெடிப்பில் 257 அப்பாவி மக்கள் கொல்லப்பட்டனர். இந்த வழக்கின் விசாரணையின்போது சட்டவிரோதமாக ஆயுதங்கள் வைத்திருந்த குற்றத்திற்காக பாலிவுட் நடிகர் சஞ்சய்தத்த்துக்கு சுப்ரீம் கோர்ட் 5 ஆண்டுகள் சிறைத்தண்டனை விதித்தது. விசாரணை காலத்தில் நடிகர் சஞ்சய் தத் ஒன்றரை ஆண்டுகள் தண்டனையை அனுபவித்திருந்ததால் அவர் மேலும் மூன்றரை ஆண்டுகள் சிறையில் இருக்க வேண்டும் என உத்தரவிடப்பட்டது.
இந்த உத்தரவின் அடிப்படையில் புனே எரவாடா சிறையில் அடைக்கப்பட்டு தண்டனை அனுபவித்து வந்த சஞ்சய்தத்தின் சிறைவாசம் இன்னும் 8 மாதங்கள் இருக்கும் நிலையில் நன்னடத்தை காரணமாக அவரை விடுதலை செய்ய மஹாராஷ்டிர அரசு முடிவு செய்தது. இன்று சஞ்சய்தத் விடுதலை செய்யப்படுவார் என்று தகவல்கள் வெளிவந்த நிலையில் இன்று காலை அவர் விடுதலை செய்யப்பட்டதை சிறை அதிகாரிகள் உறுதி செய்தனர். மேலும் இவரது விடுதலையை எதிர்த்து தாக்கல் செய்யப்பட்ட மனுவும் இன்று விசாரணைக்கு வரும் என எதிர்பார்க்கப்படுகிறது.
