ராஜீவ் மேனனின் அடுத்த படத்தில் ஏ.ஆர்.ரஹ்மான் – ஜி.வி.பிரகாஷ்
கோலிவுட்டில் சமீப காலங்களில் ஒரு இசையமைப்பாளரின் இசையில் உருவாகும் பாடல்களை இன்னொரு இசையமைப்பாளர் பாடும் வழக்கம் அதிகமாகி வருகிறது. இந்நிலையில் இசையமைப்பாளர் ஒருவர் ஹீரோவாக நடிக்கும் படத்திற்கு இன்னொரு இசையமைப்பாளர் இசையமைக்கவுள்ளார். அதாவது ஜி.வி.பிரகாஷ் நடிக்கும் படத்திற்கு ஏ.ஆர்.ரஹ்மான் இசையமைக்கவுள்ளார். இருவரும் உறவினர்கள் என்பது குறிப்பிடத்தக்கது.
பிரபல ஒளிப்பதிவாளர் ராஜீவ் மேனன், ஏற்கனவே ‘மின்சார கனவு மற்றும் ‘கண்டுகொண்டேன் கண்டுகொண்டேன்’ ஆகிய இரண்டு படங்களை இயக்கியுள்ள நிலையில் தற்போது மூன்றாவது படத்தை இயக்க அவர் முடிவு செய்துள்ளார். இந்த படத்தில் ஜி.வி.பிரகாஷ் ஹீரோவாகவும், அவருக்கு ஜோடியாக முன்னனி நடிகை ஒருவரும் நடிக்கவுள்ளார்.
இந்நிலையில் ராஜீவ் மேனனின் முந்தைய இரண்டு படங்களுக்கும் இசையமைத்த ஏ.ஆர்.ரஹ்மான் இந்த படத்திற்கும் இசையமைக்க ஒப்பந்தம் செய்யப்பட்டுள்ளதாக கூறப்படுகிறது. இந்த படத்தின் அதிகாரபூர்வ அறிவிப்பு விரைவில் வெளிவரவுள்ளது.
