அதிமுகவில் இணைந்த இரண்டு பிரபல நடிகர்கள்
தமிழகத்தில் வரும் மே மாதம் சட்டமன்ற தேர்தல் நடைபெறவுள்ள நிலையில் அனைத்து அரசியல் கட்சிகளும் சினிமா நடிகர்களை கட்சியில் இழுக்கவும், பிரச்சாரத்தில் ஈடுபட செய்யவும் தீவிர முயற்சிகள் மேற்கொண்டு வருகின்றன.
இந்நிலையில் முக்குலத்தோர் புலிப்படை தலைவரும் நடிகர் சங்க துணைத்தலைவருமான கருணாஸ் முதலமைச்சர் ஜெயலலிதாவை நேற்று நேரில் சந்தித்து தனது ஆதரவை தெரிவித்தார்.
சென்னை போயஸ் தோட்டத்தில் உள்ள முதலமைச்சர் ஜெயலலிதாவின் இல்லத்தில் நடைபெற்ற இந்த சந்திப்புக்கு பின்னர் கருணாஸ் செய்தியாளர்களிடம் கூறியபோது, ‘முதலமைச்சர் ஜெயலலிதா முடிவு செய்தால் தேர்தலில் போட்டியிட தயாராக இருப்பதாகவும், அதிமுகவுக்கு ஆதரவாக தமிழகம் முழுவதும் பிரச்சாரம் மேற்கொள்ள உள்ளதாகவும் அவர் தெரிவித்தார்.
இதேபோல் வைகோவின் ம.தி.மு.க.வில் அரசியல் ஆய்வுக்குழு உறுப்பினராக இருந்து, கடந்த 2011ஆம் ஆண்டு அக்கட்சியில் இருந்து விலகி அரசியலில் இருந்தே ஒதுங்கியிருந்த நடிகரும் இயக்குனருமான ஆர்.சுந்தர்ராஜனும் நேற்று அதிமுகவில் முதல்வர் முன்னிலையில் இணைந்தார்.
வைதேகி காத்திருந்தாள், அம்மன் கோவில் கிழக்காலே போன்ற பல விஜயகாந்த் படங்களை இயக்கிய ஆர்.சுந்தர்ராஜன், தற்போது அவருக்கு எதிராகவே பிரச்சாரம் செய்யவுள்ளார் என்பது குறிப்பிடத்தக்கது.
