மே இறுதியில் ‘கபாலி’ ரிலீஸ். ரஜினிகாந்த் அறிவிப்பு
சூப்பர் ஸ்டார் ரஜினிகாந்த் நடிப்பில் அட்டக்கத்தி பா.ரஞ்சித் இயக்கிய ‘கபாலி’ படத்தின் படப்பிடிப்பு முடிவடைந்து தற்போது போஸ்ட் புரடொக்ஷன்ஸ் பணிகள் இறுதிக்கட்டத்தில் உள்ளது. இந்நிலையில் மத்திய அரசின் ‘பத்ம விபூஷன் விருதினை பெற இன்று ரஜினிகாந்த் டெல்லி சென்றார்.
டெல்லி விமான நிலையத்தில் செய்தியாளர்கள் ரஜினியிடம் ‘கபாலி’ படத்தின் ரிலீஸ் தேதி குறித்து கேள்வி கேட்டபோது, அவர்களுக்கு பதில் கூறிய ரஜினிகாந்த், ‘கபாலி’ திரைப்படம் மே இறுதியில் அல்லது ஜூன் முதல் வாரத்தில் ரிலீஸ் ஆகும் என்று கூறினார்.
ரஜினிகாந்த், ராதிகா ஆப்தே, தன்ஷிகா, தினேஷ், கலையரசன், ஜான் விஜய் உள்பட பலர் நடித்துள்ள இந்த படத்தை சந்தோஷ் நாராயணன் இசையமைத்துள்ளார். ரஜினி படத்திற்கு சந்தோஷ் நாராயணன் இசையமைப்பது இதுதான் முதல்முறை என்பது குறிப்பிடத்தக்கது. இந்த படத்தை கலைப்புலி எஸ். தாணு மிகுந்த பொருட்செலவில் தயாரித்துள்ளார்.
