பட்ட காலிலேயே படும். ஜப்பானில் இன்று மீண்டும் நிலநடுக்கம். 2 நாட்களில் 29 பேர் பலி
அடிக்கடி நிலநடுக்கம் ஏற்படும் ஜப்பான் நாட்டில் நேற்று ஏற்பட்ட நிலநடுக்கத்தால் 10 பேர் பரிதாபமாக பலியாகியுள்ளனர். மேலும் சுமார் 650 பேர் வரை காயமடைந்து சிகிச்சை பெற்று வருகின்றனர். இந்த நிலநடுக்கத்தில் இருந்தே இன்னும் ஜப்பான் மக்கள் மீண்டு வராத நிலையில் இன்று மீண்டும் ஜப்பானில் நிலநடுக்கம் ஏற்பட்டு 19 பேர் வரை பலியாகியுள்ளதாக அதிர்ச்சி தகவல் ஒன்று வெளிவந்துள்ளது.
ஜப்பான் நாட்டின் தென்மேற்கு தீவான கியூஷு என்ற பகுதியில் இன்று அதிகாலை ரிக்டர் அளவில் 7.3 அலகுகளாக பயங்கர நிலநடுக்கம் ஏற்பட்டுள்ளது.
மிகமோசமான இந்த நிலநடுக்கம் காரணமாக பல அடுக்குமாடி வீடுகளும், தனி வீடுகளும் இடிந்து விழுந்தன. சாலைகளில் பிளவு ஏற்பட்டு, பல பகுதிகளில் போக்குவரத்து பெருமளவு பாதிப்பு ஏற்பட்டுள்ளது. மேலும் இந்த நிலநடுக்கத்தால் கியூஷு தீவுக்கு அருகில் உள்ள ஒரு எரிமலை வெடித்து, தீப்பிழம்பை கக்கி வருவதாக ஜப்பான் ஊடகங்கள் செய்தி வெளியிட்டுள்ளன.
மேலும் கட்டிட இடிபாடுகளில் சிக்கி உயிரிழந்த 19 பிரேதங்கள் இதுவரை மீட்கப்பட்டுள்ளதாகவும், மேலும் பலரை உயிருடன் மீட்கும் முயற்சியில் பேரிடர் நிவாரணம் மற்றும் தீயணைப்பு படையினர் முழுவீச்சில் ஈடுபட்டு வருவதாகவும் அரசு வட்டாரங்கள் தெரிவிக்கின்றன. இன்றைய நிலநடுக்கத்தால் சுமார் 800 பேர் காயம் அடைந்துள்ளதாகவும் அவர்கள் மருத்துவமனைகளில் சிகிச்சை பெற்று வருவதாக உள்ளாட்சிதுறை சுகாதார அதிகாரிகள் கூறுகின்றனர்.
