வாய்க்காலில் இருந்து மின்சாரம். சந்திரபாபு நாயுடுவின் சாதனை திட்டம்
நதிகள் இணைப்பு குறித்த பேச்சுவார்த்தையை பல வருடங்களாக மற்ற மாநிலங்களும் மத்திய அரசும் நடத்தி வரும் நிலையில் மிகக்குறுகிய காலத்தில் கிருஷ்ணா நதியையும் கோதாவரி நதியையும் இணைத்துக் காட்டி சாதனை செய்தவர் ஆந்திர மாநில முதல்வர் சந்திரபாபு நாயுடு. அதேபோல் இந்தியா முழுவதும் அருவிகளிலும், அணைகளில் இருந்தும் மட்டுமே மின்சார உற்பத்தி நடைபெற்று வரும் நிலையில் வாய்க்கால் மூலம் மின்சாரம் எடுக்கும் திட்டத்தை அவர் தொடங்கியுள்ளார்.
மேற்கு கோதாவரி மாவட்டத்தில் பீமாவரம் அருகே கொலவென்டிபா என்ற கிராமத்தில் வாய்க்கால் ஒன்றில் சுமார் ஒரு கிலோ மீட்டர் தொலைவுக்கு சூரிய ஒளித் தகடுகள் பொருத்தப்பட்டன. வாய்க்கால்கள் மீது 6 அடி உயரத்தில் 10 மீட்டர் அகலத்திற்கு சோலார் பேனல்கள் வரிசையாக அடுக்கப்பட்டன. இதற்காக சுமார் 7 கோடி ரூபாய் செலவிடப்பட்டது. பரீச்சாத்திய முறையில் தொடங்கப்பட்ட இந்த திட்டம் தற்போது வெற்றித்திட்டமாக மாறி மின் உற்பத்தியையும் தொடங்கியுள்ளது. இதன் மூலம் தினமும் ஒரு மெகாவாட் மின்சாரம் கிடைக்கிறது. தொடர்ந்து அந்த கிராமத்தில் 33/11 கிலோவாட் சக்தி கொண்ட சிறிய மின் நிலையம் அமைக்கப்பட்டது.
தற்போது அதில் இருந்து கிடைக்கும் மின்சாரம் சுற்றுவட்டாரத்தில் உள்ள 10 கிராமங்களுக்கு தடையில்லாமல் வழங்கப்படுகிறது. 25 ஆயிரம் மக்கள் பயன் அடைந்துள்ளனர். பல நிறுவனங்களுக்கும் அந்த கிராமத்தில் இருந்து மின்சாரம் வழங்கப்படுகிறது. ஒரு யூனிட் மின்சாரத்திற்கு 6.80 பைசாவுக்கு வசூல் செய்யப்படுகிறது .
ஆந்திர மரபுசார எரிசக்தித் துறையுடன் இணைந்து’ பெல்’ நிறுவனம் இந்த திட்டத்தை நிறைவேற்றியுள்ளது. ஜுலை 2வது வாரத்தில் இந்த திட்டத்தை ஆந்திர முதல்வர் சந்திரபாபு நாயுடு முறைப்படி தொடங்கி வைக்கிறார். பின்னர் மத்திய அரசிடம் முறையாக ஒப்புதல் பெறப்பட்டு மாநிலம் முழுவதுமுள்ள வாய்க்கால்களில் இந்த திட்டம் ஏற்படுத்தப்படவுள்ளது.
