சென்னையில் இன்று ‘தல 57’ படத்தின் பூஜை. படப்பிடிப்பு எப்போது?
அஜித் நடிப்பில் சிறுத்தை சிவா இயக்குவதாக அறிவிக்கப்பட்ட அஜித்தின் 57வது படத்தின் பூஜை இன்று சென்னையில் நடைபெறுகிறது. இந்த பூஜையில் தயாரிப்பு நிறுவனமான சத்யஜோதி பிலிம்ஸ் குழுவினர்கள், இயக்குனர் சிறுத்தை சிவா உள்பட பலர் கலந்து கொள்கின்றனர்.
இந்த படத்தின் படப்பிடிப்பு இம்மாத இறுதியில் தொடங்கப்படும் என்றும் இன்று நல்ல நாள் என்பதால் பூஜை போடப்படுவதாகவும், அஜித் வெளிநாட்டில் இருந்து திரும்பியவுடன் படப்பிடிப்பு தேதி அதிகாரபூர்வமாக அறிவிக்கப்படும் என்றும் கூறப்படுகிறது.
இன்றைய பூஜை தகவலை அஜித்தின் மேனேஜர் சுரேஷ் சந்திரா தனது டுவிட்டரில் அறிவித்துள்ளார். அஜித்தின் முந்தைய படமான ‘வேதாளம்’ படத்திற்கு இசையமைத்த அனிருத் இந்த படத்திற்கு இசையமைக்கவுள்ளார். வெற்றி ஒளிப்பதிவாளராகவும், அந்தோணி ரூபம் படத்தொகுப்பாளராகவும் ஏற்கனவே இந்த படத்திற்காக ஒப்பந்தம் செய்யப்பட்டுள்ளனர். இந்த படத்தின் அனைத்து பாடல்களையும் கபிலன் வைரமுத்து எழுதுகிறார்.
FBI அதிகாரியாக அஜித் நடிக்கும் இந்த படத்தில் அவருக்கு ஜோடியாக அனுஷ்கா நடிப்பார் என எதிர்பார்க்கப்படுகிறது. மேலும் இந்த படத்தில் கருணாகரன் காமெடி வேடத்தில் நடிக்கின்றார்.
