‘கபாலி’ தோல்வி படமா? சர்ச்சையை முடித்துவைக்க வைரமுத்து வெளியிட்ட அறிக்கை
சூப்பர் ஸ்டார் ரஜினிகாந்த் நடித்த ‘கபாலி’ படத்தை தோல்விப்படம் என்று கவியரசு வைரமுத்து சமீபத்தில் நடைபெற்ற நூல் வெளியீட்டு விழாவில் பேசியுள்ளார். பின்னர் தாணு உள்பட படக்குழுவினர் மற்றும் ரசிகர்கள் அவருக்கு பெரும் கண்டனம் தெரிவித்ததை அடுத்து ‘கபாலி’ படத்தின் வெற்றி தோல்வி என்று கூறுவதற்கு பதிலாக தவறுதலாக பேசிவிட்டதாக சப்பைக்கட்டு கட்டி ஒரு அறிக்கையை வெளியிட்டுள்ளார். இருப்பினும் தவறாக பேசியதற்கு அவர் வருத்தம் தெரிவிக்கவில்லை என்பது குறிப்பிடத்தக்கது. இதோ அவர் வெளியிட்டுள்ள அறிக்கை:
கடந்த ஞாயிறு என் நண்பரின் கவிதை நூல் வெளியீட்டு விழாவில் கலந்து கொண்டேன். நூலாசிரியரின் கடவுள் நம்பிக்கை குறித்து நான் பேச நேர்ந்தது. அவரது கடவுள் நம்பிக்கையோ எனது கடவுள் மறுப்போ எங்கள் நட்புக்கு எந்த வகையிலும் தடையாய் இருந்ததில்லை என்பதை விளக்கி சொன்னேன்
கடவுளை ஏற்றுக் கொள்வது ஒரு நிலை. புரிந்து கொள்வது ஒரு நிலை. ஏற்றுக் கொள்ளாவிட்டால்கூட அதன் உளவியல் தேவையை புரிந்து கொண்டிருக்கின்றேன் என்பதை விரிவாக சொல்ல முயன்றபோது, ஆண்-பெண் – உறவுகள் -இல்லறம் -அன்பு – காதல் – கண்ணீர்- அரசியல் – கலை – அண்மையில் காணாமல் போன விமானம் மற்றும் கபாலியின் தோல்வி இவைகளை ஏற்றுக் கொள்ள முடியாத இடத்திலும் புரிந்து கொள்ள வேண்டும் என்று உணர்ச்சி ஓட்டத்தில் குறிப்பிட்டேன். நான் சொன்ன வேகத்தில் ஒரு வார்த்தை விடுபட்டுப் போய்விட்டது என்று பிறகு புரிந்து வருந்தினேன். கபாலி வெற்றி தோல்வி என்று பேசப்படுவதை ஏற்றுக்கொள்ளாவிட்டாலும் புரிந்து கொள்ள வேண்டும் என்று சொல்ல வந்தேன். அதில் வெற்றி என்ற வார்த்தை விடுபட்டுவிட்டது.
என் நோக்கம் நான் சார்ந்திருக்கும் திரையுலகை, நான் பெரிது நேசிக்கும் ரஜினியை திட்டமிட்டு குறைத்து சொல்வதல்ல. என் நெஞ்சு தூய்மையானது. ஒரு வார்த்தை அதற்கு வசப்படாமல் போயிருக்கலாம். அதை யாரும் தவறாக புரிந்து கொள்ள வேண்டாம்.
இந்த செய்தி வெளியாவதற்கு முன்பே திரு ரஜினி சென்னை வந்த மறுநாள் அவரிடமே தொலைபேசியில் இதைக் குறிப்பிட்டு சொன்னேன். அவர் எனக்கும் சில நண்பர்கள் அப்படித்தான் சொன்னார்கள் என்று பெருந்தன்மையாக பேசினார். எங்கள் நட்பு பெரியது. தயவு செய்து யாரும் இதை சர்ச்சையாக்க வேண்டாம் என்று அன்புடன் கேட்டுக் கொள்கிறேன்.
இவ்வாறு வைரமுத்து தன்னுடைய அறிக்கையில் தெரிவித்துள்ளார்.
