பாலிவுட்டின் நடிகர், நடிகைகள் விளம்பர படங்களில் நடித்து கோடி கோடியாய் சம்பாதிக்கிறார்கள் என்பது அனைவரும் தெரிந்ததே. அழகு சாதன பொருட்கள், ஜவுளி மற்றும் வர்த்தக நிறுவனங்கள் பாலிவுட் நடிகர்களுக்கு கோடிக்கணக்கில் சம்பளம் கொடுத்து விளம்பர படத்தில் நடிக்க ஒப்பந்தம் செய்கின்றனர். சல்மான்கான், அமீர்கான், அஜய் தேவ்கான், சயீப் அலிகான், ஜஸ்வர்யாராய், கரீனா கபூர், கத்ரினா கைப் உள்ளிட்ட பலரும் சினிமாவில் சம்பாதிப்பதை விட விளம்பர படங்களில் அதிகம் சம்பாதிக்கிறார்கள்.
ஒரு விளம்பர படத்தில் நடிக்க அதிக பட்சம் ரூ.5 கோடி வரை சம்பளம் நடிகர், நடிகைகள் சம்பளம் பெறுவதாக கூறப்படுகிறது. தற்போது இந்த சாதனையை தற்போது அமீர்கான் முறியடித்துள்ளார். ஆன் லைன் வர்த்தக நிறுவனம் ஒன்று அமீர்கானை விளம்பர படத்தில் நடிக்க ஒப்பந்தம் செய்துள்ளது. ஒரே ஒரு நிமிடம் மட்டுமே ஓடக் கூடிய இந்த விளம்பர படத்தில் நடிப்பதற்கு சம்பளமாக ரூ.10 கோடியை அமீர்கானுக்கு அந்த நிறுவனம் கொடுக்கிறது.
இது இந்தி பட உலகில் பரபரப்பை ஏற்படுத்தி உள்ளது. இதற்கு முன் எந்த நடிகரும் இவ்வளவு பெரிய தொகையை சம்பளமாக வாங்கியது இல்லை என்பது குறிப்பிடத்தக்கது
