நடிகராக மாறிய பிரபல தயாரிப்பாளர்
இயக்குனர்கள், இசையமைப்பாளர்கள், பாடகர்கள் உள்பட சினிமாத்துறையில் உள்ள பலர் நடிகராக மாறி வரும் நிலையில் தற்போது பிரபல தயாரிப்பாளர் ஒருவர் நடிகராக மாறியுள்ளார். ஆம் வெங்கட்பிரபு இயக்கி வரும் ‘சென்னை 28’ படத்தின் இரண்டாம் பாகத்தில் அம்மா கிரியேஷன்ஸ் டி.சிவா முக்கிய வேடத்தில் நடித்து வருகிறாராம்.
இந்த படத்தில் ஏற்கனவே சூர்யா சிறப்பு தோற்றத்தில் நடிக்கவுள்ளதாக செய்திகள் வெளிவந்தது. ஆனால் இந்த செய்தியை சூர்யா தரப்பினர் மறுத்ததை அடுத்து தற்போது தயாரிப்பாளர் டி.சிவா இந்த படத்தில் நடித்து வருவதாகவும் இவர் சம்பந்தப்பட்ட காட்சிகள் தற்போது தேனி அருகே படப்பிடிப்பு நடைபெற்று வருவதாகவும் கூறப்படுகிறது.
‘சென்னை 600028’ படத்தின் நடித்த ஜெய், சிவா, பிரேம்ஜி அமரன், நிதின் சத்யா, விஜய் வசந்த், வைபவ் ரெட்டி, மகத், விஜயலட்சுமி ஆகிய அனைவருமே இந்த படத்தின் இரண்டாம் பாகத்திலும் நடிக்கின்றனர் என்பது குறிப்பிடத்தக்கது. யுவன்ஷங்கர் ராஜா இசையமைக்கும் இந்த படத்தை வெங்கட்பிரபுவின் பிளாக் டிக்கெட் கம்பெனி தயாரிக்கின்றது.
