‘எந்திரன் 2’ படத்தின் வில்லன் சம்பளம் ரூ.100 கோடி?
சூப்பர் ஸ்டார் ரஜினியின் நடிப்பில் ஷங்கரின் இயக்கத்தில் ரூ.300 கோடி பட்ஜெட்டில் உருவாகவுள்ள ‘எந்திரன் 2’ படத்திற்கு வில்லன் வேடத்தில் நடிக்க கடந்த பல மாதங்களாக தீவிர முயற்சியில் ஈடுபட்ட வந்த நிலையில் தற்போது வில்லன் நடிகர் உறுதி செய்யப்பட்டுள்ளது. இந்த படத்தின் வில்லன் வேடத்தில் நடிக்க கமல்ஹாசன், அமீர்கான், விக்ரம் ஆகியோர் பரிசீலனை செய்யப்பட்ட நிலையில், திடீரென ஹாலிவுட் சூப்பர் ஸ்டார் அர்னால்ட் உடன் பேச்சுவார்த்தை நடத்தப்பட்டது.
இந்நிலையில் இந்த பேச்சுவார்த்தையில் தற்போது உடன்பாடு ஏற்பட்டுள்ளதாகவும், இந்த படத்தில் நடிக்க அர்னால்டுக்கு ரூ.100 கோடி சம்பளம் பேசப்பட்டுள்ளதாகவும் கூறப்படுகிறது. ரஜினிகாந்த், அர்னால்ட், ஏ.ஆர்.ரஹ்மான், ஷங்கர் ஆகியோர்களின் சம்பளமே ரூ.200 கோடிக்கும் மேல் ஆகிறது என்றும் இதற்கு மேல் படப்பிடிப்பு, கிராபிக்ஸ் ஆகியவற்றின் செலவுகளை கணக்கிட்டால் இந்த படத்தின் பட்ஜெட் ரூ.300 கோடியை தாண்டும் என்றும் கூறப்படுகிறது.
ஆனாலும் உலக அளவில் பிரபலம் ஆகியுள்ள அர்னால்ட் , ரஜினி மற்றும் ஏ.ஆர்.ரஹ்மான் ஆகியோர்களின் பங்களிப்பால் இந்த படத்தின் வியாபாரமும் ரூ.500 கோடியை தாண்டும் என்று எதிர்பார்க்கப்படுகிறது.
