சூர்யாவின் ’24’ஐ அடுத்து அருண்விஜய்யின் ’23’
அஜித், அனுஷ்கா, த்ரிஷா நடிப்பில் கடந்த ஆண்டு வெளியான சூப்பர் ஹிட் படமான ‘என்னை அறிந்தால்’ படத்தின் வெற்றிக்கு முக்கிய காரணங்களில் ஒன்று வில்லன் நடிகர் அருண்விஜய்யின் அற்புதமான நடிப்பு. இந்த படத்திற்கு பின்னர் அவருக்கு வில்லன் மற்றும் கதாநாயகன் வேடங்களில் நடிக்க வாய்ப்புகள் குவிந்தது. அவற்றில் ஒன்றுதான் அறிவழகன் இயக்கத்தில் அருண்விஜய் நடிக்கவுள்ள திரைப்படம்.
‘ஈரம்’, ‘வல்லினம்’ மற்றும் ‘ஆறாது சினம்’ ஆகிய படங்களை இயக்கிய அறிவழகனின் அடுத்த படத்தில் ஹீரோவாக நடிக்க சமீபத்தில் ஒப்பந்தமானார் அருண்விஜய். இந்த படத்தின் டைட்டில் இன்று அறிவிக்கப்படவுள்ளதாக ஏற்கனவே செய்திகள் வெளிவந்த நிலையில் பிரபல இயக்குனர் வெங்கட்பிரபு இன்று தனது டுவிட்டரில் படத்தின் டைட்டிலை அறிவித்தார்.
இந்த படத்திற்கு ‘குற்றம் 23′ என்ற டைட்டில் வைக்கப்பட்டுள்ளது. இந்த படம் அருண்விஜய்யின் 23வது படம் என்பதை குறிக்கும் வகையில் இந்த டைட்டில் வைக்கப்பட்டுள்ளதாக கூறப்படுகிறது. சமீபத்தில் சூர்யா நடித்த ’24’ திரைப்படம் வெளிவந்திருக்கும் நிலையில் ’23’ என இன்னொரு படத்திற்கு டைட்டில் வைக்கப்பட்டுள்ளது என்பது குறிப்பிடத்தக்கது.
