ஓபிஎஸ் உண்ணாவிரதத்திற்கு குவியும் ஆதரவு. கலக்கத்தில் சசிகலா அணி
122 எம்.எல்.ஏக்கள் ஆதரவுடன் ஆட்சி அமைத்தவுடன் ஓபிஎஸ் அணி அவ்வளவுதான் என நினைத்த சசிகலா ஆதரவாளர்கள் அதிர்ச்சியடையும் வகையில் இன்றைய உண்ணாவிரதம் பெரும் பரபரப்பை ஏற்படுத்தி வருகிறது. இதனால் அதிமுக சசிகலா அணியின் தரப்பினர் கலக்கத்தில் இருப்பதாக கூறப்படுகிறது.
மறைந்த முன்னாள் முதல்வர் ஜெயலலிதாவின் மர்ம மரணம் குறித்து விசாரணை செய்ய கமிஷன் அமைக்க வேண்டும் என்பதை வலியுறுத்தி ஓபிஎஸ் அணியினர் இன்று காலை முதல் உண்ணாவிரதம் இருந்து வருகின்றனர்.
காலையில் சாதாரணமாக ஆரம்பித்த இந்த உண்ணாவிரதம் நேரம் ஆக ஆக தொண்டர்களின் அதிகப்படியான வருகையால் மைதானம் நிரம்பி வருகிறது. சென்னை ராஜரத்தினம் மைதானத்தில் கூட்டம் கூட்டமாக தொண்டர்கள் குவிந்து கொண்டே வருகின்றனர்.
தமிழகம் முழுவதும் 36 இடங்களில் நடந்து வரும் ஓபிஎஸ் அணியினர்களின் உண்ணாவிரதப் போராட்டத்துக்கு பெருமளவு பெண்கள் ஆதரவு தெரிவித்து வருகின்றனர். மேலும் சசிகலா ஒழிக கோஷமும் ஓங்கி ஒலிப்பதால் சசிகலா அணியினர் மீது இன்னும் பொதுமக்களுக்கு கோபம் குறையவில்லை என்பதையே இது காட்டுவதாக கூறப்படுகிறது.
