கார்ப்பந்தய வீரர் அஸ்வின் மரணம் விபத்தா? கொலையா? உறவினர்கள் எழுப்பிய சந்தேகம்
நேற்று முன் தினம் பிரபல கார்ப்பந்தய வீரர் அஸ்வின் சுந்தர் தனது மனைவியுடன் சென்னையில் காரில் சென்று கொண்டிருந்தபோது எதிர்பாராத விதமாக மரத்தில் மோதியதால் ஏற்பட்ட விபத்து காரணமாக பலியானார். இந்த விபத்தில் அவருடைய மனைவி நிவேதிதாவும் மரணம் அடைந்தார்.
இந்நிலையில் இந்த சம்பவத்தின்போது காரில் இருந்து வெளியே வரமுடியாத நிலை ஏற்பட வாய்ப்பு இல்லை என்றும், இது கொலையாக இருக்கலாம் என்றும் அஸ்வின் உறவினர்கள் சந்தேகம் தெரிவித்துள்ளனர்.
அஸ்வின் முந்தைய நாள் இரவில் மனைவியுடன் குடும்ப நண்பர் ஒருவரின் பார்ட்டியில் கலந்து கொண்ட பின்னர் திரும்பியபோது இந்த விபத்து ஏற்பட்டுள்ளதால் பார்ட்டியில் கலந்து கொண்டவர்களை விசாரணை செய்ய வேண்டும் என்று காவல்துறையினர்களிடம் உறவினர்கள் வலியுறுத்தியதாக கூறப்படுகிறது.
மேலும் அஷ்வின் கார் பந்தய வீரர் என்பதால் நிதானமாகத்தான் கார் ஓட்டியிருப்பார் என்றும் அதுவும் மனைவியுடன் செல்லும் போது நிச்சயமாக பாதுகாப்பாக தான் காரை ஓட்டியிருப்பார் என்றும் இந்த மரணத்தில் மர்மம் இருப்பதாகவும் சந்தேகம் எழுவதாக கூறியுள்ளனர்.
