ரூ.60 கோடி பேரம்: டெல்லி போலீசார் கைது செய்யப்படுகிறாரா டிடிவி தினகரன்
இரட்டை இலை சின்னதை பெற்று தர ரூ.60 கோடி வரை டிடிவி தினகரனிடம் பேரம் பேசி ரூ.1.30 கோடி லஞ்சம் வாங்கியதாக தலைநகர் டெல்லியில் முக்கிய அதிகாரி ஒருவர் கைது செய்யப்பட்டுள்ளார்.
அதிமுகவின் இரட்டை இலை சின்னத்தை தேர்தல் ஆணையம் முடக்கியுள்ளதால் சசிகலா மற்றும் ஓபிஎஸ் என இரு அணிகளும் இரட்டை இலை சின்னத்தை பெற தீவிர நடவடிக்கைகள் எடுத்து வருகின்றனர். இந்த நிலையில் டிடிவி தினகரன் குறுக்கு வழியில் இரட்டை இலை சின்னத்தை லஞ்சம் கொடுத்து பெற முயன்றதாக தற்போது கண்டுபிடிக்கப்பட்டுள்ளது.
இரட்டை இலை சின்னதை பெற்று தர லஞ்சம் வாங்கியதாக தலைநகர் டெல்லியில் இன்று காலை சுகேஷ் சந்திரா என்பவர் அதிரடியாக டெல்லி போலீசாரால் கைது செய்யப்பட்டுள்ளார். அவரிடம் இருந்து சுமார் ரூ.1.30 கோடியை பறிமுதல் செய்த டெல்லி போலீசார் தீவிர விசாரணை செய்ததில் அவர் டிடிவி தினகரனிடம் இரட்டை இலையை பெற்றுத்தர ரூ.60 கோடி வரை பேரம் பேசியதாக தெரியவந்துள்ளது.
இந்த வாக்குமூலத்தை அடிப்படையாக வைத்து இரட்டை இலை சின்னத்தை பெற்றுத் தர லஞ்சம் கொடுத்ததாக, டிடிவி தினகரன் மீது தில்லி குற்றப்பிரிவு போலீசார் வழக்குப்பதிவு செய்துள்ளனர். இந்த வழக்கின் அடிப்படையில் டிடிவி தினகரன் எந்த நேரமும் டெல்லி போலீசாரால் கைது செய்யப்படலாம் என்று எதிர்பார்க்கப்படுகிறது.
