ஜெயலலிதா முன்னிலையில் அதிமுகவில் இணைந்த திமுக வி.ஐ.பி
தமிழக தேர்தல் பிரச்சாரம் நாளுக்கு நாள் விறுவிறுப்பாக நடைபெற்று வரும் நிலையில் ஒரு கட்சியில் இருந்து இன்னொரு கட்சிக்கு தாவும் தலைவர்களின் எண்ணிக்கையும் அதிகரித்து கொண்டே வருகிறது. இந்நிலையில் கோவை மாவட்ட திமுகவின் முக்கிய தலைவராக விளங்கிய சி.டி.தண்டபாணியின் மகன் சி.டி.டி.ரவி திடீரென ஜெயலலிதா முன்னிலையில் இன்று அதிமுகவில் இணைந்துள்ளார். இது திமுகவினர் மத்தியில் அதிர்வலைகளை ஏற்படுத்தியுள்ளது.
கடந்த சில மாதங்களாகவே திமுகவில் எந்த பதவியும் கிடைக்காமல் ஒதுக்கி வைக்கப்பட்டிருந்த சி.டி.தண்டபாணி தலைமை மீது அதிருப்தியில் இருந்ததாக கூறப்படுகிறது. இந்நிலையில் சி.டி.டி.ரவியின் தம்பி சி.டி.டி.பாபுவுக்கு வால்பாறை தொகுதியில் போட்டியிட வாய்ப்பு கிடைக்கும் என நம்பியிருந்ததாகவும், ஆனால் அந்த வாய்ப்பு கிடைக்காததால், சி.டி.டி.ரவி அதிமுகவில் இணைந்துவிட்டதாகவும் கூறப்படுகிறது.
இதுகுறித்து சி.டி.டி.ரவி கூறியபோது, ‘நான் கட்சியை விட்டு விலகியதற்கு எந்த காரணத்தையும் சொல்ல விரும்பவில்லை. 8 மாதங்களுக்கு முன்பே அதிமுகவில் இணைவது என்று முடிவு எடுத்துவிட்டேன். அதை வெளியே சொல்லவில்லை. சொன்னால் என் மனதை மாற்ற நண்பர்கள் சிலர் முயற்சிக்கலாம்’ என்று கூறினர்.
