டிசம்பர் 11-ல் சென்னை மாரத்தான் போட்டி. சாம்பியன் பட்டத்திற்கு ரூ.1.25 லட்சம் பரிசு
சென்னை ஆண்டுதோறும் மாரத்தான் போட்டி நடைபெற்று வரும் நிலையில் இந்த ஆண்டுக்கான மாரத்தான் போட்டி வரும் டிசம்பர் மாதம் 11ஆம் தேதி ஞாயிறு அன்று நடைபெறவுள்ளது. இந்த போட்டி சென்னை ரன்னர்ஸ் சார்பில் ஷப்ரோ நிறுவனம் ஆதரவுடன் நடைபெறுகிறது.
இந்த போட்டி முழு மராத்தான், மினி மாரத்தான், 10 கிலோ மீட்டர் ஆகிய 3 பிரிவுகளில் நடைபெறவுள்ளது. முழு மாரத்தான் போட்டி 42.2 கிலோ மீட்டர் தூரமும், மினி மாரத்தான் போட்டி 21.1 கிலோ மீட்டர் தூரமும் நடைபெறும் மேலும் மேற்கண்ட இரண்டு போட்டிகளும் அதிகாலை 4 மணி மற்றும் மற்றும் 4.30 மணிக்கும் 10 கிலோ மீட்டர் பந்தயம் காலை 7 மணிக்கும் தொடங்கும்.
மொத்தம் பத்து பிரிவுகளில் நடைபெறும் இந்த போட்டி முழு மாரத்தான், மினி மாரத்தான் பந்தயங்கள் ஆண்கள், பெண்கள், 50 வயதுக்கு மேற்பட்ட ஆண்கள், 45 வயதுக்கு மேற்பட்ட பெண்கள் உள்பட பல பிரிவுகள் உள்ளன.
சென்னை மாரத்தான் பந்தயத்தில் 20 ஆயிரம் பேர் கலந்து கொள்வார்கள் என்று எதிர்பார்க்கப்படுகிறது. இதற்கான விண்ணப்ப பதிவு ஜூன் மாதம் தொடங்கியது. நவம்பர் 20-ந்தேதியுடன் விண்ணப்ப பதிவு முடிவடையவுள்ளதால் இதுவரை பதிவு செய்யாதவர்கள் பதிவு செய்யுமாறு கேட்டுக் கொள்ளப்படுகிறார்கள்
இந்த போட்டியின் மொத்த பரிசு தொகை ரூ.17.20 லட்சமாகும். முழு மாரத்தானில் ஆண்கள், பெண்கள் பிரிவில் சாம்பியன் பட்டம் பெறுபவருக்கு தலா ரூ.1.25 லட்சம் வழங்கப்படும்.
