சென்னை காவலரை வெட்டிய ரவுடியை என்கவுண்டர் செய்த போலீஸ்
சென்னை ராயப்பேட்டை காவலர் ராஜவேலு என்பவர் ஆனந்தன் என்ற ரவுடியால் அரிவாளால் வெட்டப்பட்டு உயிருக்கு போராடி வருகிறார். இந்த நிலையில் நேற்றிரவு ரவுடி ஆனந்தனை போலீசார் என்கவுண்டர் செய்ததால் பெரும் பரபரப்பு ஏற்பட்டுள்ளது.
சென்னை ராயப்பேட்டை பி.எம்.தர்கா குடிசைப் பகுதியில் தகராறில் நடப்பதாக போலீஸ் கட்டுப்பாட்டு அறைக்கு தகவல் வந்ததையடுத்து ரோந்து பணியில் ஈடுபட்டிருந்த போலீஸ்காரர் ராஜவேலு உடனடியாக அங்கு விரைந்தார். அங்கு சில இளைஞர்கள் கும்பலாக சேர்ந்து மது அருந்தி ரகளையில் ஈடுபட்டிருந்தனர். அவர்களை போலீஸ்காரர் ராஜவேலு எச்சரித்தார்.
இதனால் ஆத்திரமடைந்த அந்த கும்பல் திடீரென ராஜவேலுவை கொடூரமாக தாக்கினர். இந்த சமயம் அதே பகுதியை சேர்ந்த ரவுடி ஆனந்தன் போலீஸ்காரர் ராஜவேலுவை அரிவாளால் சரமாரியாக வெட்டியதால் ராஜவேலு படுகாயம் அடைந்து உயிருக்கு ஆபத்தான நிலையில் மருத்துவமனையில் அனுமதிக்கப்பட்டார்.
இந்நிலையில் போலீசை வெட்டிவிட்டு தலைமறைவான ரவுடி ஆனந்தனை பிடிக்கும் முயற்சியில் போலீசார் ஈடுபட்டிருந்த நிலையில் நேற்றிரவு அவர் போலீசாரால் சுட்டுக் கொல்லப்பட்டுள்ளதாக தகவல்கள் வெளியாகியுள்ளது.
