உலகையே அச்சுறுத்தி வரும் கொடிய வைரஸ் நோய் எபோலாவை ஒழிக்க சீனா புதிய மருந்து ஒன்றை கண்டுபிடித்துள்ளதாக கூறப்படுகிறது. இந்த மருந்தை விரைவில் மனித உடலில் செலுத்தி சோதனை செய்ய உள்ளதாகவும், இந்த மருந்து வெளிவந்துவிட்டால் எபோலா நோய் குறித்த பயம் முற்றிலும் நீங்கிவிடும் என்றும் கூறப்படுகிறது.
மேற்கு ஆப்பிரிக்க நாடுகளான லைபிரியா, கினியா, சியாரா லியோன் ஆகிய நாடுகளில் இதுவரை சுமார் 7000 க்கும் மேற்பட்டவர்களை பலி கொண்ட எபோலா வைரஸ் நோய்க்கு மருந்து கண்டுபிடிப்பதைல் அமெரிக்க, பிரிட்டன் உள்ளிட்ட பல்வேறு நாடுகள் தீவிர முயற்சியில் ஈடுபட்டு வரும் நிலையில் இந்த நோய் பரவுவதை தடுப்பதற்கான தடுப்பு மருந்தை சீனா கண்டுபிடித்துள்ளது.
இந்த புதிய தடுப்பு மருந்தை இம்மாத இறுதியில் மனிதர்களுக்கு செலுத்தி சோதனை செய்ய உள்ளது. இது தொடர்பாக செய்தியாளர்களுக்குப் பேட்டி அளித்த சீன பாதுகாப்புத் துறை செய்தித் தொடர்பாளர் யாங் யுஜுன் ”சீனாவில் உள்ள ராணுவ மருத்துவ அறிவியல் அகாடமி எபோலா நோய்க்கு தடுப்பு மருந்து கண்டுபிடிக்கப்பட்டுள்ளது. அரசாங்கமும் ராணுவ அதிகாரிகளும் சமீபத்தில் இந்த தடுப்பு மருந்துக்கு அனுமதி அளித்துள்ளதால் இந்த மாதத்தில் இதற்கான மருத்துவ சோதனைகள் தொடங்கும்” என்றார்.
எபோலா தடுப்பு மருந்தை மருத்துவ சோதனைக்கு உட்படுத்தும் உலகின் மூன்றாவது நாடு சீனா என்பதும், இது உலகின் முதல் மரபணு மாற்றம் செய்யப்பட்ட எபோலா தடுப்பு மருந்து என்பதும் குறிப்பிடத்தக்கது
