எம்.ஜி.ஆர் சமாதியில் தீபா. சசிகலாவுக்கு எதிரான கோஷத்தால் பதட்டம்
புரட்சி தலைவர் எம்.ஜி.ஆரின் நூறாவது பிறந்த நாளை அடுத்து எம்ஜிஆரின் அபிமானிகள் அவருடைய சிலைக்கு மாலை அணிவித்தும், மெரினாவில் உள்ள எம்ஜிஆர் சமாதியில் அஞ்சலி செலுத்தியும் வருகின்றனர்.இந்நிலையில் இன்று முக்கிய அறிவிப்பை வெளியிடவுள்ளதாக கூறிய எம்ஜிஆரின் அண்ணன் மகள் தீபா, இன்று எம்ஜிஆர் சமாதியில் அஞ்சலி செலுத்த வந்தார். ஆனால் அவருக்கு போதிய பாதுகாப்பு போலீசார் வழங்கவில்லை என அவரது ஆதரவாளர்கள் குற்றம் சாட்டினர்.
மேலும் அதேபோல் சென்னை அண்ணா சாலையில் உள்ள எம்ஜிஆர் சிலைக்கு மாலை அணிவிக்க வந்த தீபாவுக்கு அங்குள்ள போலீசார் பாதுகாப்பு ஏற்பாடுகளை செய்யவில்லை என்று கூறப்படுகிறது.
இந்நிலையில் சசிகலாவுக்கு எதிராக தீபா ஆதரவாளர்கள் திடீர் கோஷம் எழுப்பியதால் பதட்டம் ஏற்பட்டுள்ளது. ‘சசிகலா யார்? ஆட்சி நடத்துவதற்கு. பொதுச்செயலாளர் பதவியை விட்டு சசிகலா வெளியேற வேண்டும் என்றும் தீபாதான் பதவி ஏற்க வேண்டும்” என்று தீபா ஆதரவாளர்கள் கோஷம் எழுப்பியதால் பரபரப்பு ஏற்பட்டது.
