டெல்லியில் இளம்பெண்களுக்கு எதிராக தொடர்ந்து அதிகளவிலான வன்முறை சம்பவங்கள் நடந்து கொண்டு வருவதால் இவற்றை தடுப்பதற்காக இளம்பெண்களுக்கு இலவசமாக மிளகு ஸ்ப்ரே வழங்க காவல்துறையினர் முடிவு செய்துள்ளனர்.
கடந்த 5ஆம் தேதி டெல்லியில் உபேல் கால் டாக்சி டிரைவரால் இளம்பெண் ஒருவர் பலாத்காரம் செய்யப்பட்டு கொலை செய்யப்பட்டார். இந்தியாவையே உலுக்கிய இந்த சம்பவத்தை அடுத்து இளம்பெண்களுக்கு போதுமான பாதுகாப்பு கொடுப்பதுகுறித்து போலீஸார் ஆலோசனை செய்தனர். டெல்லியில் 4 மணி நேரத்திற்கு ஒரு பெண் பலாத்காரம் செய்யப்படுவதாகவும், இரண்டு மணி நேரத்திற்கு ஒரு பெண் கடத்தப்படுவதாகவும் அதிர்ச்சி சர்வே ஒன்று தெரிவிக்கின்றது. எனவே பெண்களின் பாதுகாப்புக்கு ஒருசில முன்னேற்பாடுகளை செய்ய டெல்லி போலீஸார் முன்வந்துள்ளனர்..
இந்நிலையில், டெல்லியில் இளம்பெண்களின் பாதுகாப்பிற்காக இலவசமாக அவர்கள் மிளகு ஸ்ப்ரே கேன் வழங்க போலீஸார் முடிவு செய்துள்ளனர். அதன்படி முதலில் ஆயிரம் இளம் பெண் பத்திரிகையாளர்கள், பள்ளி மற்றும் கல்லூரி இளம் பெண்களுக்கு முதல்கட்டமாக மிளகு ஸ்ப்ரே வழங்கப்படுகிறது.
இந்த மிளகு ஸ்ப்ரே கேன்கள் வேண்டிய இளம்பெண்கள், 2 பாஸ்போர்ட் போட்டோவுடன் விண்ணப்பத்தை பூர்த்தி செய்தால், அவர்களுக்கு இலவசமாக கேன்கள் வழங்கப்படும் என தெரிவிக்கப்பட்டுள்ளது.
