சச்சின் – தனுஷ் சந்திப்புக்கு உதவிய மழை
இங்கிலாந்து நாட்டில் நேற்று நடைபெற்ற இந்தியா-பாகிஸ்தான் சாம்பியன்ஷிப் போட்டியை நேரில் காண இங்கிலாந்து வாழ் இந்தியர்கள் மட்டுமின்றி இந்தியாவில் இருந்து நடிகர்கள், தொழிலதிபர்கள் உள்பட பலர் சென்றிருந்தனர். இவர்களில் தனுஷும் ஒருவர்.
இந்த போட்டியில் வழக்கம் போல பாகிஸ்தான் அணியை பிரித்து மேய்ந்து 125 ரன்கள் வித்தியாசத்தில் இந்தியா அபார வெற்றி பெற்றது. ரோஹித் சர்மா, விராத் கோஹ்லி அடித்த ரன்களை கூட மொத்த பாகிஸ்தான் அணியாலும் நடிக்க முடியவில்லை. இந்த நிலையில் இந்த போட்டி மழை காரணமாக சில நிமிடங்கள் நிறுத்தப்பட்டது.
அந்த சமயத்தில் இந்த போட்டியை நேரில் காணவும், இந்திய வீரர்களை உற்சாகப்படுத்தவும் இங்கிலாந்து சென்றிருந்த கிரிக்கெட் கடவுள் சச்சின் தெண்டுல்கர், தனது அறையில் இருந்து வெளியே வந்து ரசிகர்களை சந்தித்தார். அந்த சமயத்தில் ரசிகர்களுடன் ரசிகராக தனுஷூம் சச்சினை சந்தித்து அவருடன் புகைப்படம் எடுத்து கொண்டார். இதுகுறித்து தனது டுவிட்டரில் குறிப்பிடுகையில், ‘இந்தியா-பாகிஸ்தான் போட்டி நடந்த மைதானத்தில் கிரிக்கெட் கடவுள் சச்சின் அவர்களை நேரில் சந்தித்தேன். சந்தோஷத்தில் என்னை கட்டுப்படுத்தவே முடியவில்லை’ என்று குறிப்பிட்டிருந்தார்.
இந்த போட்டியின் நடுவே மழை பெய்ததால் தனுஷ் உள்பட ரசிகர்கள் பலர் சச்சினை நேரில் சந்தித்து புகைப்படம் எடுத்து கொண்டனர் என்பது குறிப்பிடத்தக்கது.
