மீண்டும் மாறுகிறது அதிமுக வேட்பாளர் பட்டியல். வாசனுக்கு எத்தனை இடம்?
வரும் சட்டமன்ற தேர்தலில் போட்டியிடும் 227 அதிமுக வேட்பாளர்களை அதிமுக பொதுச்செயலாளர் ஜெயலலிதா நேற்று முன்தினம் அதிரடியாக அறிவித்த நிலையில் நேற்று இரவு திடீரென அருப்புக்கோட்டை தொகுதியின் வேட்பாளரை மாற்றினார். இந்நிலையில் மீண்டும் நாளை வேட்பாளர் பட்டியல் மாறும் என எதிர்பார்க்கப்படுகிறது.
தமிழ் மாநில காங்கிரஸ் கட்சியின் தலைவர் ஜி.கே.வாசனுக்கு நாளை ஜெயலலிதா அப்பாயின்மெண்ட் கொடுத்துள்ளதாகவும், அதிமுக கூட்டணியில் வாசனுக்கு எத்தனை இடம் ஒதுக்கப்படும் என்ற முடிவுக்கு பின்னர் அதிமுக வேட்பாளர் பட்டியலில் சிறிய மாற்றம் இருக்கும் என்றும் கூறப்படுகிறது.
227 தொகுதிகளுக்கும் வேட்பாளர்களை அதிமுக அறிவித்தபோதிலும் திமுகவுடனோ அல்லது மக்கள் நலக்கூட்டணியிலோ சேராமல் அதிமுக தலைமை தன்னை கண்டிப்பாக அழைக்கும் என்று வாசன் நம்பியதாகவும், அவரது நம்பிக்கை வீண் போகவில்லை என்றும் அரசியல் வட்டாரங்கள் கூறுகின்றன.
