தேவையான பொருட்கள் :
ஃப்ரெஷ் பச்சை பட்டாணி – அரை கப்
கடலை மாவு – ஒரு கப்
இஞ்சி – சிறு துண்டு
பச்சை மிளகாய் – 4
உப்பு சர்க்கரை – அரை தேக்கரண்டி
ENO – 5 கிராம்
எண்ணெய் – ஒரு தேக்கரண்டி
எலுமிச்சை சாறு – 2 தேக்கரண்டி
தாளிக்க:
எண்ணெய் – ஒரு மேசைக்கரண்டி
கடுகு – ஒரு தேக்கரண்டி
எள்ளு – ஒரு தேக்கரண்டி (விரும்பினால்)
மிளகாய் வற்றல் / பச்சை மிளகாய் – 2
அலங்கரிக்க:
கொத்தமல்லி – சிறிது
தேங்காய் துருவல் / பனீர் – சிறிது
செய்முறை :
• பட்டாணி, இஞ்சி, பச்சை மிளகாய் மூன்றையும் மிக்ஸியில் சேர்த்து நைசாக சிறிது நீர் விட்டு அரைக்கவும்.
• கடலை மாவுடன், உப்பு, சர்க்கரை சேர்த்து கலந்து அத்துடன் அரைத்த விழுதை நன்றாக கலந்து விடவும். பதம் சரியாக வரவில்லை என்றால் இன்னும் சிறிது வெது வெதுப்பான நீர் சேர்க்கலாம்.
• இதில் எண்ணெய் மற்றும் எலுமிச்சை சாறும் சேர்த்து தோசை மாவு பதத்தில் கரைக்கவும். வேக வைக்க பயன்படுத்த வேண்டிய பாத்திரத்தில் நீர் விட்டு கொதிக்க விடவும். மாவை ஊற்றி வைக்க வேண்டிய தட்டில் எண்ணெய் தடவி வைக்கவும்.
• சட்டியில் நீர் நன்றாக கொதிக்க துவங்கியதும் ஈனோவை மாவில் சேர்க்கவும்.
• மாவை வேகமாக கலந்து தட்டில் ஊற்றி தட்டை லேசாக அசைத்து சமப்படுத்தி உடனே சட்டியில் வைத்து மூடி வேக வைக்கவும். 15 நிமிடம் வரை எடுக்கும். கத்தியால் குத்தி பார்த்து வெந்ததும் எடுத்து மேலே சிறிது நீர் தெளிக்கவும்.
• கடாயில் எண்ணெய் விட்டு காய்ந்ததும் தாளித்து டோக்ளா மேல் பரவலாக கொட்டவும். பின் டோக்ளாவை விருப்பம் போல் வடிவங்களில் நறுக்கி மேலே கொத்தமல்லி, தேங்காய் துருவல் அல்லது பனீர் போன்றவை தூவி இனிப்பு புளிப்பு சட்னியுடன் பரிமாறவும்.
